Vuçiq: Prishtina po e kërcënon stabilitetin me veprimet e njëanshme
Presidenti i Serbisë, Aleksandar Vuçiq ka zhvilluar një bisedë telefonike me ministrin e Punëve të Jashtëm të Italisë, Antonio Tajani.
Në këtë njoftim të Qeverisë serbe thuhet se se Vuçiq ka thënë se “Prishtina me veprimet e njëanshme po kërcënon stabilitetin”.
“I shpjegova Antonio Tajani pikëpamjet e Serbisë në lidhje me zhvillimin e fundit të situatës në Kosovë. Serbia, si më parë, do të sillet me seriozitet dhe me përgjegjësi, duke respektuar detyrimet dhe vendosmërinë e saj për të ruajtur paqen dhe stabilitetin, të cilën Prishtina e kërcënon me veprimet e saj të njëanshme” – thuhet në postimin e publikuar në rrjetin social “Instagram”.
Qytetarë serbë janë duke mbajtur tubim në Mitrovicën e Veriut në shenjë proteste ndaj zhvillimeve të fundit në vend.
Kjo protestë vjen një ditë pasi kryetari i Listës Serbe, Goran Rakiq dhe katër kryetarët e komunave me shumicë serbe në veri të Kosovës, kanë vendosur për bojkotimin e institucioneve të Kosovës. Sot ata dhanë dorëheqje nga këto pozita. Në veri të vendit, zyrtarë policorë të komunitetit serb kanë dhënë dorëheqje duke e dorëzuar uniformën e Policisë së Kosovës.
E gjitha kjo pasi Inspektorati Policor i Kosovës ka rekomanduar para tri ditëve suspendimin nga puna të drejtorit të Policisë së Kosovës për rajonin e veriut, Nenad Gjuriq.
Kjo nën dyshimet se Gjuriq po bën thirrje për rezistencë kur tha se policët në veri të Kosovës nuk do të zbatojnë vendimin e Qeverisë për shpërndarjen e fletëqortimeve, për shoferët që kanë automjete me targa të lëshuara nga Serbia.
Që nga 1 nëntori, autoritetet në Kosovë kanë thënë se qytetarëve që kanë automjete me targa ilegale do të marrin fletëqortime.
