Foto: KALLXO.com Ilustrim
Vrasja e 56-vjeçarit në Mitrovicë, arrestohet edhe i dyshuari i dytë
Policia e Kosovës ka njoftuar se është arrestuar edhe personi i dytë i dyshuar për përfshirje në veprën penale “vrasje e rëndë”, e ndodhur me datën 12 gusht në Mitrovicë.
Me aktvendim të prokurorit të dyshuarit K. M., 25 vjeçar, i është caktuar masa e ndalimit policor për 48 orë.
Mëngjesin e sotëm, KALLXO.com raportoi se një burrë është arrestuar nga Policia e Kosovës si i dyshuar për vrasjen e 56-vjeçarit në Mitrovicë.
I njëjti ishte gjetur pa shenja jete më 12 gusht në rrugën e UÇK-së në Mitrovicë të Jugut.
Fillimisht rasti është kualifikuar si vdekje e dyshimtë.
Sipas njoftimit, mbi dyshime të bazuara për përfshirje në rast është identifikuar dhe arrestuar dje personi i dyshuar Xh. N., 43 vjeçar.
“Në cilësi të provës materiale është konfiskuar vetura e viktimës e cila është gjetur në posedim te i dyshuari”- thuhet tutje në njoftim.
Policia tutje ka njoftuar se me aktvendim të prokurorit, të dyshuarit i është caktuar masa e ndalimit për 48 orë.
Ndërsa, rasti nga vdekje e dyshimtë është ri-kualifikuar në veprën penale “vrasje e rëndë”.