VIDEO - Zllatan Arsiq lirohet nga akuza për krime lufte

Zllatan Arsiq, i akuzuar për krime lufte kundër popullatës civile gjatë periudhës së luftës në Kosovë, është shpallur i pafajshëm nga Gjykata e Prishtinës.

Aktakuza kundër tij është ngritur në korrik të vitit 2023.

Lirimi i tij erdhi pasi, sipas gjyqtares Valbona Selimaj, Prokuroria nuk ka arritur të argumentojë me provat e saj se Zllatan Arsiq i ka ndërmarrë veprimet siç përshkruhet në dosjen e Prokurorisë.

“… pas administrimit të provave verbale, dëgjimit të dëshmitarëve para trupit gjykues, dhe pas këtyre të gjithave, administrimit të këtyre deklaratave dhe dëshmisë së tyre, përsëri prokuroria nuk ka arritur të argumentojë faktin se i akuzuari Zllatan Arsiq ishte pjesëtar i policisë serbe, nuk ka arritur ta vërtetojë faktin se ishte i akuzuari ai që e maltretoi të dëmtuarin Besim Muhaxheri, nuk ka rritur të provojë faktin se i njëjti ishte personi që ia dogji shtëpinë të njëjtit” – tha gjyqtarja sot në seancën e shpalljes.

Arsiqit iu ndërpre sot edhe masa e paraburgimit e cila i ishte caktuar më 7 mars të vitit 2023.

Ai po akuzohet për krime lufte në zonën e Kamenicës.

Ai është pjesë e Departamentit Kufitar të Policisë së Kosovës, aktualisht në suspendim me pagesë.

Para se të arrestohej për krime lufte në mars të vitit 2023, ai ishte arrestuar në shtator të vitit 2020 nga hetuesit e Inspektoratit Policor nën dyshimet për lejim të kontrabandës në fshatin Karaçevë të Komunës së Kamenicës.

Që nga ajo kohë Arsiq është i suspenduar nga detyra e tij.

Gjykimi ndaj tij për krime lufte ka filluar në nëntor të vitit 2023, e i njëjti nuk e ka pranuar fajësinë për akzuat e Prokurorisë.

Shpallja e aktgjykimit u bë nga gjyqtarja Valbonë Selimaj.

Dosja për krime lufte

Sipas aktakuzës, Zllatan Arsiq në marsin e vitit 1999 para bombardimeve të NATO-s, në stacionin policor në Kamenicë, me uniformë të Policisë serbe e i armatosur kishte rrahur dhe trajtuar në mënyrë çnjerëzore të dëmtuarin Besim Muhaxheri.

Aktakuza thotë se Arsiq këtë e kishte bërë në bashkëkryerje me pjesëtarë të tjerë të Policisë serbe.

Ai akuzohet se duke qenë në veturë policore e kishte ndaluar të dëmtuarin dhe i është drejtuar me fjalët: “Ku po i dërgon këto cigare?”, “UÇK-së po ja dërgon”, “Tash të tregoj se për kënd i ke blerë cigaret”.

Pasi që e kishin detyruar të shkojë me biçikletë në stacionin policor në Kamenicë, sipas aktakuzës, e kanë goditur me shufër gome, shqelma dhe grushte në pjesë të ndryshme të trupit për plot një orë e gjysmë.

Akti akuzues thotë se i dëmtuari Muhaxheri është torturuar në mënyrë çnjerëzore, me ç’rast ka pësuar lëndime të rënda trupore dhe traumë.

Përveç këtij rasti, Zllatan Arsiq po akuzohet se ka marrë pjesë në dëbimin e qytetarëve të Kamenicës në periudhën shkurt deri mars të vitit 1999.

Tutje, aktakuza thotë se së bashku me pjesëtarë të tjerë të Policisë serbe kanë filluar plaçkitjen dhe djegien e shtëpive të shqiptarëve.

Sipas aktakuzës, disa ditë pasi që kishte ndodhur torturimi i të dëmtuarit, Arsiq është takuar me të dëmtuarin në oborrin e shtëpisë së tij, shtëpi e cila ishte djegur pas dëbimit të të dëmtuarit.