Tërmeti në Japoni: Numri i të vdekurve rritet në 62 dhe me shumë të mbijetuar nën rrënoja
Ekipet e shpëtimit japonezë po përpiqen të kërkojnë të mbijetuarit ndërsa autoritetet kanë paralajmëruar për rrëshqitje të dheut dhe shi të dendur pas një tërmeti të fuqishëm që vrau të paktën 62 njerëz.
Tërmeti me magnitudë 7.5 të hënën që tronditi prefekturën Ishikawa në ishullin kryesor të Honshu shkaktoi valë cunami më shumë se një metër të lartë, ndezi një zjarr të madh dhe copëtoi rrugët.
Gadishulli Noto i prefekturës u godit më rëndë, me disa qindra ndërtesa të shkatërruara nga zjarri dhe shtëpi të rrafshuara në disa qytete, duke përfshirë ëajima dhe Suzu. Imazhet satelitore të publikuara ara dhe pas tërmetit të mërkurën dhanë një ide për shkallën e shkatërrimit.
Qeveria rajonale njoftoi të mërkurën se 62 persona ishin konfirmuar të vdekur dhe më shumë se 300 të plagosur, 20 prej tyre në gjendje të rëndë.
Numri i të vdekurve pritet të rritet ndërsa ekipet e shpëtimit po përballen me pasgoditjet dhe motin e keq për të kapërcyer rrënojat.
Më shumë se 31,800 njerëz janë në strehimore, sipas qeverisë japoneze. Mediat japoneze raportojnë se dhjetëra mijëra shtëpi janë shkatërruar.
Operacionit iu dha një urgjencë shtesë pasi Agjencia Meteorologjike Japoneze (JMA) lëshoi një paralajmërim për shi të dendur në këtë zonë.
Gati 34,000 familje janë ende pa energji në prefekturën Ishikawa. Shumë qytete janë edhe pa ujë të rrjedhshëm.
Trenat e shpejtë në Shinkansen dhe autostradat kanë rifilluar funksionimin pasi disa mijëra njerëz mbetën të bllokuar, disa për gati 24 orë.
Tërmeti i fuqishëm – të cilin JMA e mat në 7.6 magnitudë – ishte një nga më shumë se 400 sosh që e tronditën rajonin deri të mërkurën në mëngjes.
Japonia përjeton qindra tërmete çdo vit dhe shumica dërrmuese nuk shkaktojnë dëme.
Numri i tërmeteve në rajonin e gadishullit Noto është rritur në mënyrë të qëndrueshme që nga viti 2018, ka thënë një raport i qeverisë japoneze vitin e kaluar.
Japonia pati pësuar një tërmet masiv nënujor me magnitudë 9,0 ballë në Japoninë verilindore në vitin 2011, i cili shkaktoi një cunami që la rreth 18,500 njerëz të vdekur ose të zhdukur. Ai gjithashtu përmbyti uzinën atomike të Fukushimës, duke shkaktuar një nga katastrofat më të këqija bërthamore në botë.
Përgatiti: Nuhi Shala
