Stoltenberg paralajmëron shtim të trupave të KFOR-it në Kosovë

Sekretari i Përgjithshëm i NATO-s, Jens Stoltenberg ka thënë se Këshilli i Atlantikut të Veriut ka autorizuar dërgimin e forcave shtesë në Kosovë, pas sulmit terrorist i cili ndodhi të dielën në Banjskë të Zveçanit.

“Këshilli i Atlantikut të Veriut u takua sot (29 shtator 2023) për të diskutuar situatën në Kosovë. Aleatët shprehën shqetësimin e tyre të thellë për tensionet në rritje në veri të Kosovës. Që nga maji, ne kemi përmirësuar praninë dhe qëndrimin e KFOR-it. Vetëm dje Këshilli i Atlantikut të Veriut autorizoi forca shtesë për të adresuar situatën aktuale”-ka thënë ai në një deklaratë për media të publikuar në faqen zyrtare të NATO-s.

Tutje Stoltenberg ka theksuar se KFOR mbetet i përkushtuar që në Kosovë të ruaj mjedis të sigurtë dhe në mënyrë të paanshme.

“Misioni KFOR i NATO-s mban një prani të dukshme dhe të shkathët në mbarë Kosovën. Ne gjithmonë do të ndërmarrim të gjitha veprimet e nevojshme për të ruajtur një mjedis të sigurt dhe të sigurt dhe lirinë e lëvizjes për të gjithë njerëzit që jetojnë në Kosovë. Ne e bëjmë këtë në mënyrë të paanshme dhe në përputhje me mandatin tonë të OKB-së”- ka thënë ai.

Stoltenberg ka thënë se KFOR është i gatshëm të veprojë në rast se situata kërkon diçka të tillë.

“Ne gjithmonë do të vazhdojmë të sigurohemi që komandanti ynë të ketë burimet dhe fleksibilitetin e nevojshëm që KFOR-i të përmbushë mandatin e tij. Ne jemi të gatshëm të bëjmë rregullime të mëtejshme në qëndrimin e KFOR-it sipas nevojës”- tha ai.

Sekretari i Përgjithshëm i NATO-s, Jens Stoltenberg  në deklaratën e tij ka thënë KFOR-i vazhdon të koordinohet ngushtë me të gjitha palët relevante të interesit në Beograd dhe Prishtinë, si dhe me Misionin e BE-së për Sundimin e Ligjit (EULEX), OSBE-në, Misionin e OKB-së në Kosovë dhe komunitetin diplomatik.

Ai ka kërkuar nga Kosova dhe Serbia ti kthehen dialogut sepse sipas tij ky është çelësi për sigurinë e qëndrueshme në Kosovë dhe stabilitetin në rajon.

“U bëjmë thirrje të gjitha palëve që urgjentisht të de-përshkallëzojnë. Ne vazhdojmë t’i bëjmë thirrje Beogradit dhe Prishtinës që të angazhohen në dialogun e lehtësuar nga BE-ja, si mënyra e vetme për të zgjidhur çështjet e pazgjidhura dhe për të arritur zgjidhje që respektojnë të drejtat e të gjitha komuniteteve”- ka thënë ai.

Pjesëtari i Policisë së Kosovës, Afrim Bunjaku, u vra, një tjetër u plagos dhe një tjetër u lëndua, pas një sulmi nga një grup terrorist nga Policisë së Kosovës në Banjskë të Zveçanit, rreth orës 3 të mëngjesit të 24 shtatorit.

Prokuroria Speciale e kishte konfirmuar se të dyshuarit ata do të hetohen për veprat penale “Veprat e rënda kundër rendit kushtetues dhe sigurisë së Republikës së Kosovës’’, “Sulm kundër rendit kushtetues të Republikës së Kosovës’’, “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës’’ dhe “Mbajtja në pronësi, kontroll ose posedim të paautorizuar të armëve’’.

Organet e rendit konfirmuan se tre sulmues janë vrarë dhe tetë të tjerë janë arrestuar, dy prej tyre të uniformuar dhe katër të tjerë që ndihmonin në operacion përmes radiolidhjeve dhe dy janë arrestuar mbrëmë në një hotel në afërsi të Banjkës.

Katër nga të arrestuarit janë liruar, për mungesë provash, njoftoi të mërkurën Prokuroria Speciale e Kosovës.