Rama uron që të ketë bashkëpunim të dobishëm me qeverinë Kurti
Kryeministri i Shqipërisë, Edi Rama, u ka uruar suksese Lëvizjes Vetëvendosje dhe LDK-së në formimin e qeverisë.
Rama ka uruar që të kenë bashkëpunim të dobishëm për shqiptarët në të dy anët e kufirit.
“Pres me padurim të shtrojmë në tryezë çështjen e lëvizjes së lirë të qytetarëve e të sipërmarrjeve në kufirin tonë”, ka shkruar Rama në Twitter.
Suksese VV-LDK në formimin e qeverisë së re dhe në qeverisjen e Kosovës! Uroj të kemi një bashkëpunim sa më të dobishëm për shqiptarët këtej e andej kufirit dhe pres me padurim të shtrojmë në tryezë çështjen e lëvizjes së lirë të qytetarëve e të sipërmarrjeve në kufirin tonë????
— Edi Rama (@ediramaal) February 2, 2020
Sot është nënshkruar marrëveshja për koalicionin qeverisës mes Lëvizjes Vetëvendosje dhe LDK-së, gati 4 muaj që kur janë mbajtur zgjedhjet e jashtëzakonshme, më 6 tetor 2019.
Sipas marrëveshjes së arritur, Qeveria e re do t’i ketë 15 ministri, dy zëvendëskryeministra dhe 33 zëvendësministra.
Glauk Konjufca, i cili është zgjedhur më 26 dhjetor kryetar i Kuvendit, do të largohet nga kjo pozitë për të kaluar në ekzekutiv, kurse ulësja e kryetarit të Kuvendit të Kosovës do t’i kalojë LDK-së.
Po ashtu, çështja e presidentit nuk është pjesë e marrëveshjes së nënshkruar, por për këtë do të merren vesh Mustafa e Kurti kur të vijë koha dhe t’i përfundojë mandati presidentit aktual.
Në muajin tetor të vitit 2019, Kurti ishte pritur nga kryeministri i Shqipërisë, Edi Rama.
Ky ishte takimi i parë mes tyre pas një kohe të gjatë raportesh të ftohura.
