Radoiçiq merr përgjegjësinë për sulmin terrorist, pranon se qëndron mbrapa armatimit dhe logjistikës 

Milan Radoiçiq ka pranuar zyrtarisht me anë të një letre se ka qenë mbrapa sulmit terrorist të 24 shtatorit në fshatin Basnjkë të Komunës së Zveçanit, ku u vra një rreshter i policisë e u plagos një tjetër.

Letrën e Radoiçiq e lexoi para mediave, avokati i tij Goran Petronijeviq.

“Njoftoj të gjithë persekutorët vigjilentë të popullit serb, nga Kurti e te ndihmësit e tij të shumtë të huaj, se unë personalisht i kam bërë të gjitha përgatitjet logjistike për mbrojtjen e popullit tonë kundër pushtuesit dhe ky akt i imi nuk ka asnjë karakter apo qëllim tjetër dhe nuk ka të bëjë fare me të kaluarën time aty” – thuhet në letrën e Radoiçiqit.

“Kthimi im në veri nuk kishte të bënte me punën time në veri me Listën Serbe, andaj jap dorëheqje të parevokueshme nga posti i nënkryetarit të Listës Serbe” – thuhet në letrën e Radojiçiq.

Avokati Petronijeviq tha se nuk ka arritur që të shoh pamjet që janë transmetuar se klienti i tij ka qenë pjesë e grupit që mori pjesë në sulmin e 24 shtatorit.

Por ajo çka konfirmoi avokati Petronijeviq është se Milan Radojiçiq nuk ka qenë i plagosur dhe nuk është trajtuar në aspektin shëndetësor.

“Unë nuk mund të gjykoj asgjë, sepse këtë incizim fatkeqësisht as nuk e kam parë, për sa i përket gjendjes shëndetësore, as nuk ka qenë i plagosur as nuk ka qenë i trajtuar” – tha avokati Petronijeviq.

Avokati i Radojiçiq nuk po pranon të përgjigjet në pyetjet e gazetarëve të cilat lidhen me armatimin dhe organizimin e sulmit terrorist të mbi 30 personave në Banjskë të Zvecanit.

Radojiçiq ka shkruar se meqenëse aty nuk ishte në kuadër të Listës Serbe jep dorëheqje nga pozita e tij në këtë parti politike që funksionon në Kosovë.

“Jap dorëheqje të parevokueshme në vendin e nënkryetarit të Listës Serbe. Jam i gatshëm që në lidhje me këto ngjarje tu përgjigjem ftesës së organeve të Serbisë. Rroftë Serbia. Millan Radojiçiq”- kjo është deklarata e tij.

Në këtë sulm terrorist u vra rreshteri policor Afrim Bunjaku.

“Polici i Kosovës ka humbur jetën nga shpërthimi nga plumbi, nga një plumb i cili nuk ishte as për të as për dikë tjetër. Nëse ndodh që do të ketë ndonjë deklaratë për këtë atëherë do të flasim”- tha avokati tutje.

Milan Radojiçiq i priu grupit terrorist që kreu sulmin e 24 shtatorit në Banjskë të Zveçanit ndaj Policisë së Kosovës.

Në pamje të cilat u transmetuan e që janë nga droni shihet Radojiçiq me disa nga pjesëtarët e grupit në hapësirat e jashtme të bujtinës e cila ishte pjesë e Manastirit të Zveçanit.

KALLXO.com ka qenë dhe ka raportuar nga afër për situatën në Banjskë pas sulmit terrorist të 24 shtatorit.

Kush është avokati i Radoiçiq?

Goran Petronijeviq, avokati i Millan Radoiçiq, pas diplomimit në vitin 1983, u punësua në Gjykatën e Parë Komunale të atëhershme në Beograd si praktikant, më pas si bashkëpunëtor profesional dhe nga viti 1989 si gjyqtar.

Në vitin 1996 u zgjodh gjyqtar i Gjykatës së Qarkut në Beograd dhe në vitin 1997 u bë zëvendëskryetar i Gjykatës së Qarkut në Beograd.

Nga viti 1998 deri në qershor 1999 ka qenë gjyqtar i Gjykatës së Qarkut në Pejë dhe gjykatës hetues special i Ministrisë së Drejtësisë së RFJ-së për hetimin e krimeve të luftës në territorin e Kosovës.

Ai është avokat që nga qershori i vitit 2001.

Si avokat ka mbrojtur rastet më të njohura në fushën e krimit të organizuar dhe krimeve të luftës para gjykatave vendore dhe ndërkombëtare. Klientët e tij më të famshëm janë Rade Markoviq, ish-shefi i Sigurimit të Shtetit të RFJ-së (njeriu i shërbimit ushtarak në shërbimin civil serb), Aco Tomiq, ish-shefi i Sigurisë Ushtarake të RFJ-së, Veselin Šljivančanin – para Tribunalit të Hagës, Radovan Karaxhiq, ish-lideri i serbëve të Bosnjës, i cili u dënua për gjenocid në Tribunalin e Hagës.

Ai është themelues i Lëvizjes për Serbinë, shtëpisë mediatike “Russian Express” dhe organizatës joqeveritare “Qendra për rivendosjen e së drejtës ndërkombëtare”. Subjekt politik serb, i financuar nga Rusia.