Qeveria Hoti vendos Koordinator për Dialog
Sot në mbledhjen e Qeverisë u miratua vendimi për themelimin e Këshillit të Ekspertëve për dialogun Kosovë-Serbi.
Zëvendëskryeminstri Driton Selmanaj, tha se Këshilli i Ekspertëve për Dialogun Kosovë-Serbi do të bëjë analiza specifike dhe do të këshillojë kryeministrin dhe Qeverinë për çështje të dialogut me Serbinë.
Ky këshill do të përgatis dokumente për propozicionin e Kosovës, dokumente analitike, faktografike dhe dokumente tjera sipas nevojës. Ndërsa buxheti i këshillit bëhet me propozimin dhe miratimin në Qeveri.
Sipas Selmanajt me miratimin e këtij vendimi, kryeministri do të emërojë koordinatorin për dialog i cili udhëheq punën e këshillit, është njëkohësisht edhe këshilltar i kryeministrit dhe i përgjigjet drejtpërdrejt atij.
“Koordinatori është person kontaktues dhe kordinues në emër të kryeministrit me të gjitha palët sa i përket procesit të dialogut. Koordinatori sipas nevojës fton në këshill ekspert nga institucionet e ndryshme si dhe ekspert të jashtëm” tha Selmanaj.
Aktakuza e ngritur nga Prokurori i Specializuar i Gjykatës Speciale e cila u publikua javën e kaluar ndaj presidentit të Kosovës, Hashim Thaçi për krime kundër njerëzimit, ka mjegulluar të ardhmen e dialogut Kosovë-Serbi.
Aktakuza e Speciales ndaj presidentit dhe ish-pjesëtarëve tjerë të UÇK-së, përfshirë ish-kryeparlamentarin Kadri Veseli, u bë publike tri ditë para takimit të Uashingtonit më 27 qershor, i cili edhe më pas dështoi të mbahej.
Në këtë takim që ishte thirrur nga ShBA-të pritej të riniste procesi i negociatave mes të dyja vendeve, ndonëse ishte paralajmëruar se kishte të bënte me zhvillimin ekonomik.
