Partia Demokratike e Shqipërisë voton për zgjedhjen e kryetarit

Partia Demokratike e Shqipërisë (PD) zgjedh të shtunën kryetarin e ri. Qendrat e votimit janë hapur në orën 08:00 dhe do të mbyllen më 19:00.

Thirrja për votim u është dërguar 25 mijë anëtarëve të partisë. Në garë janë ish-kryetari i kësaj force politike, Lulzim Basha dhe përballë tij është Gjergj Hani, një ish-i persekutuar politik.

Pas votimit, Lulzim Basha ka thënë për gazetarët se sot nis ringritja e Partisë Demokratike.

“Kjo ditë ka domethënie të veçantë për nga rrethanat unike. Unike sepse jemi përballur me sfida si askush. Ata mijëra demokratë që sot po u drejtohen kutive të votimit kanë duruar sulme të padenja e të pamerituara. Po ata nuk kanë duruar për interesat e tyre personale, por për kauzat dhe vlerat që bashkojnë këtë familje politike, që bashkojnë shqiptarët”, ka thënë Basha.

Rivali i tij Gjergj Hani i ka ftuar demokratët të marrin pjesë në votime.

PD-ja shkon në këto zgjedhje e përçarë dhe e ndarë në tri pjesë.

Numri i anëtarëve që pritet t’iu drejtohen kutive të votimit të shtunën është reduktuar në 25 mijë, ose tri herë më pak sesa ishte në zgjedhjet e fundit në këtë parti në vitin 2021, kur anëtarësia numëronte rreth 75 mijë persona.

Deri para këtij procesi PD ishte e ndarë në dy pjesë, mes mbështetësve të Lulzim Bashës dhe atyre të Sali Berishës.

Por, zhvillimi i këtij procesi e ka thelluar edhe më shumë përçarjen.

Zgjedhjet për kreun e PD-së janë kundërshtuar nga një tjetër grupim, nga Sekretari i Përgjithshëm, Gazmend Bardhi dhe shtatë deputetë që e mbështesin atë.

Një ditë më parë një grup deputetësh e çoi këtë çështje në gjykatë, duke depozituar vendimin e Këshillit Kombëtar për anulimin e zgjedhjeve, pezullimin e kryesisë, përfshirë edhe kërkesën për çregjistrimin e Lulzim Bashës, që vijon të jetë kryetar i PD-së, në regjistrin e partive politike.

Situata e paqartë dhe e paqëndrueshme në PD është krijuar pas 21 marsit të vitit 2022, kur Lulzim Basha ka dhënë dorëheqje si kryetar i PD-së dhe vendin e tij e ka zënë Enkelejd Alibeaj.

Më 25 mars të 2022, Gjykata e shkallës së parë në Tiranë e ka njohur si të ligjshëm Kuvendin Kombëtar të thirrur nga Berisha dhe të gjitha vendimet që u morën prej tij.

Ky vendim është apeluar nga Enkelejd Alibeaj, si ushtrues detyre i Partisë Demokratike.

Gjykata e Apelit pati vendosur që çështja të rigjykohet në shkallën e parë të gjyqësorit.

Pas humbjes së thellë të Partisë Demokratike në zgjedhjet vendore të 14 majit, ushtruesi i detyrës së kryetarit, Enkelejd Alibeaj, ka dhënë, po ashtu, dorëheqje.

PD zyrtare është në zyra me qira, pasi selinë e saj e ka marrë me dhunë Berisha./ REL