Paralajmërimi për protesta në Serbi, QKMK bënë thirrje të shmangen pikat kufitare me Serbinë

Sot gjatë ditës janë paralajmëruar protesta në Serbi, përkatësisht në zonën afër pikë-kalimit kufitar me Kosovën, në Jarinjë.

Qendra Kombëtare për Menaxhim Kufitar u ka bërë thirrje të gjithë qytetarëve që t’i shmangin pikë-kalimet me Serbi.

“Njoftohen të gjithë qytetarët të cilët planifikojnë të udhëtojnë përmes Pikë Kalimeve Kufitare me SRB, se në pjesën e SRB, për nesër, datë 25 Maj 2024, janë paralajmëruar protesta” – thuhet në njoftim.

“Ju inkurajojmë që të përdorni PKK tjera për qarkullim. Ky njoftim vlen deri në një njoftim tjetër” – thuhet në njoftim.

KALLXO.com ka marrë vesh se pika kufitare në Jarinjë është njoftuar se nesër rreth orës 13:00 në anën e kufirit serb do të mbahet një protestë me moton “Kosova është Serbi”. Deri tani nuk ka informacione se kush e ka organizuar.

Në TikTok kanë qarkulluar video me thirrjen për t’iu bashkuar protestës më 25.05.2024.

“Ja u kthyem nga Beogradi, kryeqyteti i Serbisë dhe arsyeja e tubimin tonë është se nuk guxojmë kurrsesi të harrojmë se Kosova e Metohia është pjesë përbërëse e Serbisë. Për shkak se po ndodh ajo që po ndodh, që po na bëhet presion, se një pjesë e territorit tonë, Kosovës e metohisë, është e okupuar, më nuk mund të heshtim. Me këtë rast, planifikojmë të mbajmë një miting, protestë më 25 maj, të shtunën, në pikëkalimin e Jarinjes. Këtë herë unë ju ftoj si komandant i Armatës Ortodokse Serbe që të gjithë ata që munden të vijnë aty, bashkë me ne” – thuhet në njërën nga videot, në të cilën flet Dejan Neskoviq.