Osmani në Gllogjan për Epopenë e Dukagjinit: Flakadan i lirisë

Presidentja e Kosovës, Vjosa Osmani ka qëndruar në Gllogjan në kujtim dhe nderim të përvjetorit të Epopesë së Dukagjinit.

“Flakadan i lirisë” është epiteti që Presidentja i ka vendosur Epopesë së Dukagjinit – duke shtuar se është nga momentet më të ndritura të luftës për liri.

“Në themelet e Kosovës së pavarur qëndron sakrifica e heronjve të UÇK-së, e familjes Haradinaj dhe e të gjithë atyre të cilët u ngritën kundër padrejtësisë, e për lirinë dhe shtetin tonë.” – ka shkruar mes të tjerash Osmani.

Osmani ka shkruar se amaneti i heronjve obligon ndërtimin e një shteti të fortë, dinjitoz, të përparuar e me aleanca të fuqishme.

Lirinë e ka quajtur trashëgimi të tyre dhe përgjegjësi tonën.

“Me nderimin më të madh përkulemi para dëshmorëve Himë Haradinaj, Gazmend Mehmetaj dhe Agron Mehmetaj, të cilët dhanë jetën në këtë datë, për të mos vdekur kurrë. Ata u bënë simbol i rezistencës, guximit dhe besimit në lirinë e Kosovës.” – ka shkruar tutje Osmani.

Në fotografitë e postuara nga Osmani ajo  qëndron së bashku me Rifat Jasharin, Ramush Haradinajn e kryetarin e Deçanit Bashkim Ramosajn.