Nagavci: Në organet e LVV-së nuk është diskutuar posti i Presidentit
Deputetja e Lëvizjes Vetëvendosje, Arbërie Nagavci, ka thënë se në organet e kësaj partie ende nuk është diskutuar për emrat e përveçëm që mund të jenë bartës përgjegjësish në legjislaturën e re.
Sipas saj, nuk është diskutuar as për postin e presidentit të vendit.
“Sa i përket bartësve të përgjegjësive. Deri më tani asnjë emër i përveçshëm nuk është diskutuar në organet tona, as për pozitat në ekzekutiv e aq më pak për postin e presidentit”, ka shkruar ajo në rrjetin social ‘Facebook’, të martën.
Nagavci ka deklaruar se LVV qëndrimet e veta fillimisht i diskuton gjatë e me seriozitet në organet e veta.
“Jemi të kënaqur që kemi bërë një hap përpara me harmonizimin e programit duke vendosur kështu një standard të ri”, ka shkruar ajo tutje.
“Dua të besoj se qytetarëve do t’u ofrojmë atë që kanë kërkuar: se opozita e deri djeshme do të jetë qeverisja e sotme”, përfundon Nagavci, e cila ishte deputete edhe e legjislativit të kaluar.
Në zgjedhjet e 6 tetorit, Lëvizja Vetëvendosje ka dalë e para, e pasuar nga Lidhja Demokratike e Kosovës.
Këto dy parti ende nuk kanë arritur të formojnë një koalicion qeverisës.
LVV ka deklaruar se LDK po barrikadon arritjen e marrëveshjes duke kërkuar postin e presidentit.
Në anën tjetër, kjo e fundit e ka mohuar.