Mbi 1 miliard euro të dërguara nga mërgata në Kosovë për këtë vit

Banka Qendrore e Kosovës (BQK), ka bërë të ditur se vlera e parave të dërguara nga mërgata në Kosovë, e njohur ndryshe si remitencat, deri në muajin shtator 2023, ka arritur në 1 miliard e 12 milionë e 600 mijë euro, që sipas BQK-së ka shënuar rritje prej 11% në krahasim me periudhën e njëjtë të vitit 2022.

Sipas raportit të statistikave të remitencave dhe institucioneve tjera financiare për shtator 2023, vlera e remitencave vetëm për muajin shtator ishte 116.9 milionë euro.

“Sipas raportit, prurjet më të mëdha të remitencave ishin nga institucionet financiare jo-bankare me pjesëmarrje prej 57.4%, pasuar nga kanalet tjera me 24.4% dhe bankat me 18.2%” – thuhet në njoftimin e BQK-së.

Po ashtu, BQK-ja ka bërë të diturse 70% e dërgesave të mërgatës vijnë nga vendet e Bashkimit Evropian, ku Gjermania ka pjesëmarrje me 38.1%, ndjekur nga Zvicra me 17.6%, si dhe nga SHBA-ja me 7.5%.

Në lidhje me asetet e kompanive të sigurimit, deri  në muajin shtator vlera e tyre ishte 298.1 milionë euro. Ndërsa asetet e fondeve pensionale kanë arritur vlerën e 2.62 miliardë eurove.

“Në fund, BQK-ja tregon se asetet e ndërmjetësve tjerë financiar në fund të muajit shtator 2023 janë rritur për 3.1 milionë euro, krahasuar me muajin paraprak duke arritur vlerën e 479 milionë eurove” – thuhet në njoftimin e BQK-së.