Samiti i Investimeve në Ballkanin Perëndimor
Kryeministrat e shteteve të Ballkanit Perëndimor mblidhen në Londër
Samiti i Investimeve në Ballkanin Perëndimor ka mbledhur në kryeqytetin anglez, Londër, kryeministrat e gjashtë shteteve; Kosovës, Shqipërisë, Bosnjës dhe Hercegovinës, Malit të Zi, Maqedonisë së Veriut dhe Serbisë.
Banka Evropiane për Rindërtim dhe Zhvillim (BERZH) që është nikoqire e këtij Samiti për herë të gjashtë, ka njoftuar që të gjithë kryeministrat e shteteve përkatëse e kanë konfirmuar pjesëmarrjen.
Kryeministri i Kosovës Albin Kurti në këtë takim do të marrë pjesë së bashku me ministrin e Financave, Punës dhe Transfereve, Hekuran Murati.
Qëllimi i Samitit është të nxjerrë në pah mundësitë e mundshme për investime dhe biznes në rajonin e Ballkanit Perëndimor dhe të promovojë projekte rajonale dhe ndërkufitare. Ky është samiti i gjashtë i BERZH-it i këtij lloji.
Pika kryesore tradicionale e Samitit është “Sesioni i Kryeministrave” interaktiv – do të shohë që liderët rajonalë dhe presidenti i BERZH-it t’i drejtohen audiencës me vizionin e tyre të përgjithshëm për rajonin, projektet kryesore rajonale dhe mundësitë për investime në nivel rajonal dhe në secilin të vendeve të rajonit.
Në rendin e ditës parashihet që sesioni i kryeministrave të ketë pyetje dhe përgjigje të zgjeruara me investitorët e huaj.
Para këtij sesioni do të mbajë fjalë presidentja i BERZH, Odile Renaud-Basso, Presidenti i Këshillit Evropian Charles Michel dhe Komisoneri i BE-së për Fqinjësinë dhe Zgjerimin Olivér Várhelyi.
Mes të tjerash, BERZH ka njoftuar që deri më tani kanë investuar më shumë se 18 miliardë euro në Ballkanin Perëndimor.
Samiti inaugurues i Ballkanit Perëndimor u zhvillua në BERZH dhjetë vjet më parë, në shkurt 2014 dhe, për herë të parë, mblodhi të gjithë kryeministrat e rajonit.
Më 13.12.2023 ishte mbajtur Samiti i përbashkët i liderëve të Bashkimit Europian me kolegët e tyre nga gjashtë vendet e Ballkanit Perëndimor.
Kosova në këtë Samit ishte përfaqësuar nga presidentja e vendit, Vjosa Osmani.
Ndërsa, Samiti i mbajtur më 06.12.2022 ishte mbajtur për herë të parë në rajon, në Tiranë.
Banka Evropiane për Rindërtim dhe Zhvillim u themelua në vitin 1991 për të krijuar një epokë të re të pas Luftës së Ftohtë në Evropën Qendrore dhe Lindore.
