Kandidatët për kryetar të Obiliqit tregojnë a do të bëjnë koalicione
Kandidati për kryetar të Komunës së Obiliqit nga Iniciativa Qytetare për Obiliq, Xhafer Gashi, ka deklaruar se nuk do të formojë koalicion me asnjë subjekt politik për rundin e dytë që pritet të mbahet më 14 nëntor.
“Ne do të vazhdojmë pa koalicion, me qytetarët, kurse sa i përket Asamblesë, të gjitha projektet që janë në të mirën e qytetarëve, unë besoj se do t’i votojmë. Kurse, ato që nuk janë të pëlqyera për Asamblenë, nuk kanë nevojë t’i votojnë”, tha Gashi në emisionin “Debat Përnime”.
Gashi përball kundërshtarit të tij nga Lëvizja Vetëvendosje tha se kandidati Halil Thaçi është duke zhvilluar negociata për koalicion dhe sipas tij, janë premtuar edhe disa drejtori.
“Kishte me qenë mirë me i njoftu qytetarët, që ka zhvillu negociata me Mehmet Krasniqin dhe ia ka premtu postin e nënkryetarit dhe drejtorin e Bujqësisë. Pastaj me z. Ajet Berisha nga LB-ja ia ka premtu Drejtorinë e Shëndetësisë, gjithashtu Drejtorinë e Shërbimeve Publike, Buqi i Klinakëve. Z. Enver Grajqevci do ta ketë Drejtorinë e Infrastrukturës sipas informave që i kemi”, u shpreh ai.
Për këto pretendime reagoi Thaçi duke thënë se Xhafer Gashi po e luan rolin e zëdhënësit të partisë.
Sa i përket koalicionit, Thaçi tha se ende nuk ka diçka zyrtare.
“Po me vjen keq në çfarë niveli bie kryetari aktual i Komunës, me lu zëdhënësin e një subjekti. Më kish ardhë keq me ra në këtë nivel. Unë as nuk kam mendu me kë do të qeverisë z. Gashi. Nuk është e imja që ta bëjë këtë. Neve ende nuk kemi asgjë. Unë i kam bërë thirrje të gjitha subjekteve, pikësëpari të gjithë qytearëve, që ata që jenë për ndryshim, për një qeverisje më duar të pastra, dhe pa nepotizëm”, tha kandidati i LVV-së për Obiliqin.
Kandidatët e partive politike, të cilët synojnë të marrin udhëheqjen e Obiliqit diskutojnë në “Debat Përnime” për balotazhin e 14 nëntorit.
Të ftuar në DebatPernime janë kandidatët që kanë shkuar në balotazh në Obiliq: Xhafer Gashi nga Iniciativa Qytetare për Obiliq dhe Halil Thaçi nga Lëvizja Vetëvendosje.
Sipas rezultateve përfundimtare të KQZ-së, kandidati i IQO për kryetar të Obiliqit, Xhafer Gashi, në raundin e parë të zgjedhjeve më 17 tetor ka marrë 5 mijë e 975 vota apo 48,12 për qind. Kurse kandidati i LVV-së, Halil Thaçi ka siguruar 2mijë e 507 vota apo 20,19 për qind.
