Isa Mustafa kujton masakrën e Mejës

Kryetari i LDK-së, Isa Mstafa në nderim të 21 vjetorit të masakrës së Mejës dhe Ditës së të Zhdukurve, tha se pranvera e vitit 1999 ka qenë  më e rënda në historinë e Kosovës.

“Në këtë stinë Serbia filloi përpjekjet e fundit për të zhbërë popullin e Kosovës duke ekzekutuar me mijëra fëmijë, gra dhe burra. Kreu krime të tmerrshme kundër njerëzimit, shkatërroi, dogji dhe dëboi një popull nga shtëpitë e tyre”, tha Mustafa.

“Është e rëndë për shumë familje që 21 vite pas luftës në Kosovë, për fat të keq varret dhe eshtrat e më të dashurve të tyre nuk i dinë ende”, ka shtuar ai.

Ai ka thënë se kjo ditë koincidon edhe me Masakrën e Mejës, e cila, sipas Mustafës, është një nga krimet më monstuoze të forcave serbe mbi popullatën civile shqipare.

“Në këtë masakër janë vrarë mbi 376 burra të kësaj ane. “Lëdina e Pikëllimit” është e mbushur me varre të grave, burave, fëmijëve dhe të moshuarve të cilët nuk u kursyen”, tha kreu i LDK-së.

Më tej, Mustafa tha se Masakra e Mejës dhe shumë masakra tjera në Kosovë janë dëshmi e krimeve të Serbisë që janë kryer në vendin tonë.

“Të gjitha këto ngjarje tronditën ndërgjegjen njerëzore të botës së civilizuar dhe kapërcyen çdo kufi. Serbia duhet sa më parë të kthej eshtrat e të zhdukurve dhe kryesit e krimit të përgjigjen para drejtësisë”, tha Mustafa.

“Sot, është një ditë më shumë që frymëzohemi për të punuar dhe dashur më shumë shtetin tonë”, ka thënë në fund ai.

Meja është vendi i masakrës më të madhe të policisë serbe dhe ushtrisë jugosllave gjatë luftës së fundit në Kosovë.

Kurse, 27 Prilli shënohet Dita e të Zhdukurve në Kosovë.