Hoxhaj: Qeveria Kurti ia ka hapur dyert Serbisë në tërë botën

Nënkryetari i Partisë Demokratike të Kosovës (PDK), Enver Hoxhaj, ka reaguar pas asocimit të Serbisë në organizatën më të madhe të Azisë, ASEAN.

Përmes një postimi në Facebook, Hoxhaj ka fajësuar qeverinë e drejtuar nga Albin Kurti, për hapje të dyerve për Serbinë.

Sipas tij nga Evropa në Amerikë, e nga Azia në Amerikën Latine, Kosova asnjëherë nuk ka qenë me kaq pak prezencë në marrëdhëniet ndërkombëtare prej vitit 1989, sesa si tash me qeverinë Kurti.

“Politikës së jashtme së Kosovës i është shuar vullneti dhe tharë energjia e mbrojtjes së interesit shtetëror. Aty ku me dekada Serbia ishte e izoluar, me qeverinë Kurti, i janë hapur dyert në tërë botën, sikurse asocimi i shpejt i Serbisë në ASEAN, organizatën më të madhe në Azi” – ka shkruar ai në Facebook.

Sipas tij, me qeverinë Kurti nuk i vjen asnjë njohje e re Kosovës.

“Natyrisht, këtu për tërheqjet e njohjeve nga Azia, se as që mund të bëhet fjalë për të marrë njohje të reja! Si e sheh Evropa Kosovën, nuk tregojnë recitimet në Forumet Alpbach dhe Bled, por kërcënimet për heqjen e liberalizimit të vizave nga Parisi dhe Berlin” – ka theksuar ai.