Kryeministri i Kosovës, Avdullah Hoti - Foto: ZKM

Hoti tregon për strategjinë e Qeverisë në rast të valës së dytë të pandemisë

Kryeministri i Kosovës, Avdullah Hoti, priti në takim përfaqësuesit e Odës së Mjekëve të Kosovës, të kryesuar nga kryetari Pleurat Sejdiu.

Në këtë takim, ku i pranishëm ishte edhe ministri i Shëndetësisë, Armend Zemaj, Hoti falënderoi profesionistët shëndetësorë, të cilët që prej fillimit të pandemisë e deri në ditët e sotme ishin në krye të detyrës.

“Kryeministri Hoti nga përfaqësuesit shëndetësorë është njoftuar rreth situatës së fundit me pandeminë COVID-19, për të cilën tha se Qeveria e Kosovës e ka prioritet të parë luftimin e saj dhe do të vazhdojë të mbajë të mobilizuar sistemin shëndetësor dhe infrastrukturën mbështetëse për të parandaluar përhapjen e virusit dhe trajtuar rastet e prekura”, thuhet në njoftim të ekzekutivit.

Sipas një komunikate për media të qeverisë, Hoti ka theksuar se Qeveria do të vërë në zbatim një strategji afatmesme për të përgatitur sistemin shëndetësor në rast të një vale të dytë të pandemisë, me qëllim që të ketë nën kontroll situatën me pandeminë.

Kjo qasje, sipas tij, është e nevojshme pasi masat e izolimit dhe distancimit fizik nuk mund të vazhdojnë të mbesin armët e vetme në luftën kundër virusit.

“Për t’u rikthyer gradualisht në jetën tonë të zakonshme, duhet të krijohet një infrastrukturë mobile monitorimi dhe reagimi ndaj COVID-19 dhe ndoshta në të ardhmen, edhe ndaj epidemive të tjera”, tha kryeministri.

Siç tha ai, kjo infrastrukturë do të përfshijë kapacitetet për të kryer numër më të madh testesh, si virologjike ashtu edhe serologjike, në popullatën e përgjithshme simptomatike dhe asimptomatike; krijimi i një strukture qendrore të mbikëqyrjes për analizën e të dhënave në kohë reale; forcimin e kapaciteteve regjionale të mbikëqyrjes epidemiologjike përmes qendrave të monitorimit periferik me shpërndarje në gjithë territorin, duke përfshirë zhvillimin e sistemeve “ të inteligjencës epidemike” që zbulojnë herët çdo shenjë të shpërthimit të epidemive; forcimin e rrjetëzimit midis strukturave  operative dhe profesionistëve; sigurimi i mandatit ligjor dhe ndërtimi i një strategjie të komunikimit publik së bashku me mediat për të shmangur dëmet nga alarmimi i ekzagjeruar apo nga nënvlerësimi i rrezikut.

“Kryeministri Hoti vlerësoi se vetëm një qasje e tillë e menaxhimit të pandemisë ku fillimisht vendoset kontrolli e pastaj vendosen masat për identifikim të hershëm të rikthimit të virusit, mundëson kthimin në normalitet”, thuhet në njoftim.

Ndërsa, përfaqësuesit e Odës së Mjekëve të Kosovës citohen të kenë thënë se mbështetja e Qeverisë është e domosdoshme për përballimin me sukses të pandemisë COVID-19.

“Po ashtu, ata shprehën gatishmërinë e tyre që me tërë kapacitetin profesional dhe njerëzor të punojnë për luftimin e kësaj pandemie, duke bërë thirrje që qytetarët të jenë të kujdesshëm dhe t’i respektojnë masat e nevojshme për ruajtjen e shëndetit, në veçanti duke i mbajtur maskat dhe duke e respektuar largësinë fizike”, thuhet në komunikatë.

Sipas të dhënave zyrtare, deri më tani në Kosovë janë infektuar 1,269 qytetarë me coronavirus, janë shëruar 912 pacientë dhe 31 kanë vdekur.

Do NOT follow this link or you will be banned from the site!