Gjykimi ndaj ish-drejtorit të Sekretariatit të KPK-së, Lavdim Krasniqit dhe të tjerëve - Deklarohen rreth fajësisë
Ish-drejtori i Sekretariatit të Këshillit Prokurorial të Kosovës (KPK), Lavdim Krasniqi, si dhe Marigona Berisha e Flora Doda janë ulur në bankën e të akuzuarve edhe një herë tjetër në Rigjykimin ndaj tyre.
Ata akuzohen për vepra penale si “keqpërdorim të detyrës zyrtare”, “ushtrim ndikimi” dhe “mosraportim të pasurisë”.
Ish-drejtori i Sekretariatit të KPK-së, Lavdim Krasniqi akuzohet se bashkë me shoferin e tij, Ardian Krasniqi në disa lokacione kishin kërkuar dhe pranuar para dhe dhurata në vlerë prej 40,000 euro nga B.M., duke i premtuar se do të ushtronin ndikimin e tyre për t’ia ulur dënimin, si dhe për t’ia shtyrë ekzekutimin e dënimit me burg.
Sipas Aktakuzës, të akuzuarit e lartcekur në bashkëkryerje i kanë mundësuar të dyshuarit A.M., që të arratisej nga territori i Republikës së Kosovës për në Shqipëri, duke shfrytëzuar veturën zyrtare të KPK-së, konkretisht të drejtorit të SKPK-së – duke konsumuar veprën penale “keqpërdorim i detyrës zyrtare”.
Në Rigjykim, palët u deklaruan edhe një herë tjetër rreth fajësisë. Krasniqi tha se nuk ndihet fajtor për asnjë Pikë të Akuzës. Njëjtë janë deklaruar edhe Berisha dhe Doda.
“I pafajshëm për të gjitha Pikat.” – u deklarua Krasniqi.
Pas deklarimit rreth fajësisë, prokurori i rastit Arianit Salihu dhe avokatët e të akuzuarve kanë dhënë fjalët hyrëse lidhur me këtë rast.
Që të gjithë janë deklaruar se qëndrojnë pas fjalëve hyrëse që i kanë dhënë në shyrtimet gjyqësore të kaluara.
Pas kësaj Gjyqtari i Çështjes, Alban Ajvazi ka proceduar me dëgjimin e 10 dëshmitarëve të cilët kanë deklaruar se qëndrojnë prapa deklaratave që i kanë dhënë në shqyrtimet e kaluara gjyqësore.
Në këtë seancë është dëgjuar edhe ekspertja e prokurimit publik, Blerina Shamolli e cila ka deklaruar se qëndron prapa ekspertizës që e kishte përpiluar për këtë rast.
Në seancën e radhës do të dëgjohet eksperti i cili kishte përpiluar ekspertizën grafologjike për këtë rast.
Më 05.11.2024 Lavdim Krasniqi, Marigona Berisha dhe Flora Doda kanë dalë për herë të dytë në Gjykatën e Apelit.
Gjykata e Apelit për herë të parë e kishte kthyer këtë rast në rivendosje, më 07.11.2023.
Nga Gjykata Themelore me Vendimin e dytë, Lavdim Krasniqi ishte liruar nga akuzat e Prokurorisë për “ushtrim ndikimi në bashkëkryerje”, “mosraportim të pasurisë” dhe “keqpërdorim të detyrës zyrtare”.
E akuzuara Marigona Berisha ishte gjetur fajtore në akuzën lidhur me veprën “falsifikim i dokumentit” dhe është dënuar me 3,000 euro gjobë. Ndërsa ishte liruar nga akuza për veprën penale “blerja ose pranimi i sendeve të përfituara nga vepra penale”.
Aktgjykim lirues ka pasur edhe ndaj të akuzuarës Flora Doda, e akuzuar për veprën penale “keqpërdorim i detyrës zyrtare”.
Lirimin nga akuzat gjatë shpalljes së Aktgjykimit kryetari i Trupit Gjykues Alban Ajvazi e kishte arsyetuar me faktin se nuk është provuar se të njëjtit kanë kryer veprat penale për të cilat janë akuzuar.
Aktgjykimi ishte marrë nga Trupi Gjykues në përbërje të gjyqtarëve: Alban Ajvazi (Kryetar) Alltën Murseli dhe Gëzim Ademi (anëtarë).
Lidhur me akuzat edhe në Rigjykim: Lavdim Krasniqi, Flora Doda dhe Marigona Berisha nuk e kanë pranuar fajësinë.
Kurse Flora Doda ishte liruar nga akuza për “keqpërdorim të detyrës zyrtare”. Aktgjykimi dënues herën e parë ishte marrë më 09.03.2023.
KALLXO.com kishte raportuar që nga fillimi i këtij rasti, i cili filloi në mars të vitit 2021.
Lavdim Krasniqi, i cili atëherë mbante postin e Drejtorit të Sekretariatit të Këshillit Prokurorial të Kosovës dhe Marigona Berisha u shoqëruan për në Stacionin Policor, nën dyshimet se janë përfshirë në afera korruptive.
Ish-drejtori i Sekretariatit të KPK-së, Lavdim Krasniqi akuzohet se bashkë me shoferin e tij, Ardian Krasniqi në disa lokacione kishin kërkuar e pranuar para dhe dhurata në vlerë prej 40,000 euro nga B.M., duke i premtuar se do të ushtronin ndikimin e tyre për t’ia ulur dënimin, si dhe për t’ia shtyrë ekzekutimin e dënimit me burg.
Me këto veprime, sipas Prokurorisë, të akuzuarit Lavdim Krasniqi dhe Ardian Krasniqi kanë kryer veprën penale “ushtrimi i ndikimit”.
Sipas Aktakuzës, të akuzuarit e lartcekur në bashkëkryerje i kanë mundësuar të dyshuarit A.M., që të arratisej nga territori i Republikës së Kosovës për në Shqipëri – duke shfrytëzuar veturën zyrtare të KPK-së, konkretisht të drejtorit të SKPK-së; duke konsumuar veprën penale “keqpërdorim i detyrës zyrtare”.
Sipas Prokurorisë, këtë veprim e kishin marrë duke përdorur logon zyrtare dhe rotacionin të cilin e posedonte vetura e KPK-së, më ç’rast kishin kaluar në territorin e Shqipërisë.
Sipas Aktakuzës, të akuzuarit Lavdim Krasniqi dhe Flora Doda kanë shkelur procedurat dhe rregullat e prokurimit publik dhe me këtë në bashkëkryerje kanë kryer veprën penale “keqpërdorimi i pozitës apo autoritetit zyrtar”.
Në Aktakuzë thuhet se ai së bashku me zyrtaren Flora Doda kishin porositur dhe pranuar mobilie në vlerë 9,480 euro, ndërsa pas disa ditëve kishin lidhur Kontrata dhe zhvilluar procedura fiktive në kundërshtim me Ligjin.
Po ashtu, sipas Aktakuzës, i pandehuri Lavdim Krasniqi ka kryer veprën penale “mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.
Sipas Prokurorisë, ai nuk e kishte përfshirë në deklarimin e pasurisë shumën e 40,000 eurove që i kishte marrë pas shitjes së banesës, si dhe shumën prej 10,000 eurove të cilat ia kishte dhënë miku i tij në emër të blerjes së dy banesave në vlerë prej 121,000 euro.
Ndërsa shoferi i tij, Ardian Krasniqi akuzohet edhe për “falsifikim të dokumenteve zyrtare”, pasi sipas Prokurorisë kishte falsifikuar rezultatet e testit për COVID-19 për B.M., me qëllim që të njëjtit t’i mundësohej shtyrja e ekzekutimit të dënimit.
Akuza rëndojnë edhe ndaj asistentes së Krasniqit, Marigona Berisha.
Sipas Prokurorisë, ajo kishte përpiluar dokumente të falsifikuara, pasi kishte falsifikuar deklaratën në emër të B.M., me të cilën pretendonte se i kishte paguar të njëjtit shumën prej 8,400 eurove në zyrën e noterit Sefedin Blakaj.
Deri te zbulimi i kësaj vepre, Prokuroria pretendimin për falsifikim e mbështet edhe në ekspertizën e Agjencisë Kosovare për Forenzikë, e cila ka konstatuar se nënshkrimi i B.M. në atë dokument nuk ishte i tij.
Përpos kësaj, Marigona Berisha akuzohet me pretekstin se kishte pranuar pasurinë duke qenë në dijeni se e njëjta ishte fituar me vepër penale të shkaktuar nga Lavdim Krasniqi dhe Ardian Krasniqi, përkatësisht veturën e tipit “VW T-Roc”, në vlerë prej 25,000 euro.
Raportimet e KALLXO.com për këtë rast mund t’i gjeni në këtë LINK.
