Prishtinë, një i vdekur e një i lënduar nga shembja e dheut në një vendpunishte

Një person ka humbur jetën e një është lënduar nga shembja e dheut që ka ndodhur sot, më 05.04.2025, në Prishtinë.

Rastin e ka konfirmuar për KALLXO.com zëdhënësi i Policisë, Agron Borovci.

Sipas Borovcit, rreth orës 13:00 është pranuar informacioni se dy persona janë zënë nga shembja e dheut në një vendpunishte në rrugën “Gjilani” në lagjen Veterniku në Prishtinë.

“Nga informacionet e para është bërë e ditur se njëri nga ta është nxjerrë nga aty dhe po merr trajtimin e nevojshëm mjekësor në QKUK, ndërkaq fatkeqësisht, tjetri, mashkull, rreth 40 vjeç, është konstatuar  pa shenja jete, nga ana e mjekëve emergjent” – ka thënë zëdhënësi.

Policia ka dalë në vendin e ngjarjes, dhe në koordinim me prokurorin e shtetit si dhe mekanizmat e tjerë të nevojshëm po vijon punën për sqarimin e rrethanave që karakterizojnë ngjarjen.