Ferizaj kërkon nga qytetarët të shmangin vizitat për rastet jo urgjente në komunë

Komuna e Ferizajt ka bërë reduktimin esencial të stafit nëpër departamente si pasojë e rrezikut nga coronavirusi.

Kjo sipas komunës është bërë me qëllim të mbrojtjes së shëndetit publik, përkatësisht shëndetit të qytetarëve që frekuentojnë e kërkojnë shërbimet komunale.

Megjithatë sipas njoftimit, po vijojnë të ofrohen e përmbushen kërkesat e qytetarëve, veçanërisht ato që kanë të bëjnë me dokumentacionet civile.

“Kërkojmë nga qytetarët që të shmangin vizitat e kërkesat jourgjente pranë administratës komunale, në dobi të mbrojtjes së shëndetit të tyre nga ekspozimi evenual ndaj rrezikut të virusit COVID-19”, thuhet në njoftim.

Në Kosovë tashmë janë identifikuar 13 të infektuar me këtë virus  që vijnë nga komuna e Malishevës, Vitisë, Klinës dhe Podujevës.

Këto katër komuna janë izoluar.

Coronavirusi tashmë ka prekur më shumë se 168 mijë njerëz në botë dhe mbi 6 mijë e 500 persona kanë vdekur.