Dalibor Jevtiq: Kërkojmë të ndalet dhuna institucionale sa më shpejt që është e mundur
Kryetari i Komunës së Shtërpcës, Dalibor Jevtiq ka thënë se përmes protestave të organizuara sot në mënyrë demokratike janë duke bërë thirrje për mbrojtje tek bashkësia ndërkombëtare.
“Përmes kësaj proteste të qetë, përmes kësaj heshtjeje, po protestojmë pa asnjë incident. Po japim porosi të qartë se duam të luftojmë me mjete demokratike dhe se është përgjegjësi e të gjithëve, si atyre që mbajnë qeverinë në Prishtinë ashtu edhe e bashkësisë ndërkombëtare, nga të cilët kërkojmë mbrojtje, mbrojtje institucionale”, ka thënë ai.
Gjatë fjalimit të tij, drejtuar protestuesve serb që ishin mbledhur në Graçanicë, Jevtiq ka thënë se suspendimi i kryetares së Gjykatës në Mitrovicë është dhunë institucionale.
“Vendimi për ta pamundësuar votimin e serbëve dhe suspendimi i kryetares së gjykatës në Mitrovicë Liljana Stefanovic është edhe një dëshmi shtesë e planit të qartë të qeverisë së Kosovës. Me këtë protestë kërkojmë që të ndalet dhuna institucionale sa më shpejt që të jetë e mundur. Në ditët e ardhshme do të kemi konsultime me Vuçiqin dhe të marrim vendime”, tha ai.
Më 3 prill 2022, Serbia mban zgjedhjet presidenciale dhe parlamentare.
Zyrtarët e lartë serbë kërkuan që ato të organizohen edhe brenda territorit të Kosovës.
Por me këtë nuk u pajtuan krerët e institucioneve kosovare. Kryeministri, Albin Kurti, tha se për këtë duhet të ketë një marrëveshje mes dy vendeve.
Ndërkohë, Bashkimi Evropian njoftoi se shteti i Kosovës ka refuzuar një propozim të vendeve të QUNIT-it.
Para zgjedhjeve në Serbi, presidenti Vuçiq ka thirrur një mbledhje të Këshillit Kombëtar të Sigurisë.
Pesë eprorë të Policisë së Kosovës në veri të vendit, janë parë në takimin e thirrur nga presidenti i Serbisë, Aleksandar Vuçiq, pas përfundimit të mbledhjes së Këshillit Kombëtar të Sigurisë.
Inspektorati Policor i Kosovës (IPK) ka njoftuar se ka marrë informacionet dhe është njoftuar zyrtarisht për pjesëmarrjen e eprorëve të Policisë së Kosovës në pjesën e veriut të vendit në takimin të cilin e thirri presidenti i Serbisë, Aleksandar Vuçiq, dy ditë më parë.
Edhe, Këshilli Gjyqësor i Kosovës (KGjK) ka suspenduar kryetaren e Gjykatës Themelore të Mitrovicës, Liljana Stevanoviq, për pjesëmarrje në takimin e thirrur nga presidenti serb.
Suspendohet kryetarja e Gjykatës së Mitrovicës pas pjesëmarrjes në takimin e organizuar nga Vuçiq
