Rruga e pashtruar në fshatin Dumnicë e Poshtme në Vushtrri
Banorët e Dumnicës së Ulët kërkojnë zgjidhje për rrugën e pashtruar
Një rrugë e paasfaltuar në fshatin Dumnicë e Ulët të Vushtrrisë po ua vështirëson qarkullimin banorëve të kësaj ane.
Rruga, “ Rexhep Hasani” tash e disa vite është e shtruar vetëm me zhavor.
Ismet Hasani, banor në këtë rrugë tha për KALLXO.com se si shkak i baltës veturat e tyre po e kanë problem lëvizjen.
“Qikjo rrugë neve po na sjellë probleme sa dush po e shihni edhe vet mbrapa meje që na ka mbet kamioni që dy-tri ditë me mezi e ka nxjerr nuk ka mujt me dal prej lloqi. Fëmijët kanë me shku në shkollë na kemi me shku në punë, tonat halle i kemi në këtë rrugë ”
Hasani shton tutje se kanë bërë edhe kërkesë për zgjidhje në Komunën e Vushtrrisë.
“ Mua më kanë thënë qatë herë mbas kërkesës që e kam bërë, që mu ka kthy negativ, që nuk kemi mjete. Por çka është bërë mbas anej, mas atyre mjeteve janë shtru edhe shtatë e tetë rrugë tjera. Nuk e di unë ka i murrën ata, ato mjete. Na mbetem qitu ku jemi”
Problem tjetër i këtyre banorëve është edhe përroi që kalon afër shtëpive të tyre.
Sipas banorit tjetër, Blerim Latifi, përroi po u sjell probleme me vërshime çdo herë kur bie shi.
“ Papastërtia e tij shkakton gjithçka vetëm kur kalon këndej është erë e rëndë e lejë më shtëpitë që janë afër këtij lumi. Ka pas donacione që janë dhënë për dëmet që janë bërë ato as për pastrimin e tepiave nuk ishin dal e leje më për ndonjë gjë tjetër që me i kompensu ato. Kështu që kërkesa e fshatit tonë është të bëhet thellimi i këtij lumi”, tha ai.
Ndërsa Komuna e Vushtrrisë në një përgjigje për KALLXO.com ka thënë se rruga, “ Rexhep Hasani” pritet të asfaltohet gjatë këtij viti.
“Rruga “Rexhep Hasani” është përzgjedhur si rrugë me nevojë për asfaltim nga komisioni dhe e njëjta është votuar nga anëtarët e Kuvendit në shtator të vitit 2020. Si e tillë, kjo rrugë planifikohet të asfaltohet këtë vit pasi që edhe janë ndarë mjetet buxhetore”, tha Berat Sadiku, drejtor i Urbanizimit në Komunën e Vushtrrisë.