AAK: Do ta krijojmë një byro të hetimeve të ngjashme si FBI

Ish-ministri i Drejtësisë nga Aleanca për Ardhmërinë e Kosovës, Selim Selimi, i cili është edhe kandidat për deputet, ka thënë se partia e tij ka një plan konkret për luftimin e korrupsionit në vend.

Ai, në DebatPernime ka shpalosur edhe idetë që do t’i implimentonte në rast në qeveri do të jetë AAK.

Selimi tha se partia e tij ishte kundër shuarjes së Task Forcës antikorrupsion, por sipas tij do të krijohet një byro e hetimeve, e ngjashme sikur në Shtetet e Bashkuara të Amerikës.

“Ne  kemi në plan luftimin e korrupsionit, i kemi marr edhe disa hapa konkret. E kemi bërë rregulloren për sinjalizuesit, për t’i mbrojtë ata. E kemi ndërruar ligjin për avukaturën shtetrore, ku i kemi detyruar avokatët e shtetit, që t’i lajmërojnë veprat korruptive, pasi shumica e korrupsionit bëhet nëpër tenderë”, ka thënë Selimi në DebatPernime.

“Ne mendojmë që në momentin që ngritet aktakuza për korrupsion, ne mendojmë që duhet me shku në shtëpi”, tha ish-ministri i Drejtësisë.

Selimi nga AAK ka përsëritur që, partia e Ramush Haradinajt ishte kundër shuarjës së Task Forcës kundër korrupsionit, e cila u shua nga qeveria aktuale që drejtohet nga Avdullah Hoti.

“Ne kemi qenë edhe kundër shuarjes së task forcës kundërkorrupsinit. Ne do ta kemi një task forcë e cila do të shndërrohet potencialisht në byro të hetimeve, e ngjashme me FBI-në, këtë vit kemi dal në rajon për korrupsion”, deklaroi ai.

Pjesë e debatit të sotëm janë: Selim Selimi nga AAK, Shkëmb Manaj e Valdet Hoxha nga LDK, dhe Adnan Rrustemi e Doarsa Kica nga LVV, të cilët do të flasin për ‘Sundimin e ligjit’.

Debati transmetohet në orën 20:20 në RTV Dukagjini dhe drejtpërdrejt në Facebook të KALLXO.com.

Cikli i DebatPernime i moderuar nga Jeta Xharra do të mbahet gjatë dhjetë ditëve të fushatës zgjedhore për zgjedhjet e jashtëzakonshme parlamentare në Kosovë, të cilat do të mbahen të dielën, me 14 shkurt.

Përballë Jeta Xharrës do të jenë kandidatët për deputetë nga partitë dhe koalicionet kryesore që garojnë në zgjedhjet e jashtëzakonshme të 14 shkurtit.