22-vjetori i bombardimeve të NATO-s, Konjufca priti në takim komandantin e KFOR-it 

Ushtruesi i Detyrës së Presidentit të Kosovës, Glauk Konjufca, ka pritur sot në takim komandantin e KFOR-it, gjeneralmajor Franco Federici.

Në një njoftim të Zyrës së Presidentit, thuhet se Federici e ka përgëzuar Konjufcën për suksesin në zgjedhje, duke ofruar vazhdimin e bashkëpunimit të mëtejmë për sigurimin e një ambienti të paqësor për të gjithë qytetarët e Kosovës.

Konjufca thuhet se ka përmendur 24 marsin e vitit 1999, kur ndërhyrja e forcave të NATO-s, shpëtoi shqiptarët e Kosovës nga shfarosja nga ana e regjimit gjenocidal të Serbisë.

Tutje në komunikatë thuhet se në 22 vjetorin e bombardimeve ndaj caqeve të ushtrisë dhe policisë serbe në Kosovë, U.D. Presidenti Konjufca ka falënderuar komandantin Federici për kontributin e shtetit italian, forcave të NATO-s, por edhe ato të KFOR-it, të cilat ndihmuan për lirinë e Kosovës dhe po ndihmojnë edhe më tej në aspektin e sigurisë.

“Në qershor të vitit 1999 ka ndodhur rikthimi i 1 milion shqiptarëve të dëbuar nga regjimi serb. Ne kemi rilindur”, ka theksuar Konjufca, duke iu referuar kontributit të Aleancës Veriatlantike për lirinë e Kosovës.

Më pas, Konjufca ka bërë homazh dhe ka vendosur kurorë te monumenti i pllakës memoriale të ushtarëve të KFOR-it, të rënë gjatë shërbimit në Kosovë.

22 vjet nga fillimi i bombardimeve të NATO-s kundër Serbisë