13 Aeroporte në grevë: anulohen shumica e fluturimeve në Gjermani

Greva njëditore e punëtorëve në 13 Aeroporte gjermane – përfshirë të Munihut dhe Frankfurtit – si dhe destinacionet e tjera të mëdha në vend kanë shkaktuar anulimin e shumicës së fluturimeve të hënën e 10 marsit – raporton televizioni informativ Euronews.

Më shumë se gjysmëmilion udhëtarë mund të përballen sot me shtyrje të fluturimeve në mbarë vendin, derisa raportohet se 3,400 fluturime mund të anulohen – ka bërë të ditur Shoqata e Aeroporteve Gjermane (ADV).

Pasagjerëve u është kërkuar që të mos udhëtojnë fare drejt aeroporteve dhe po këshillohen që t’i kontaktojnë Kompanitë e tyre ajrore të biletave për informacione, ose për fluturim nëpërmjet Aeroporteve të tjera.

Greva 24-orëshe, që ka nisur në mesnatë, përfshin punëtorët e Sektorit publik në Aeroporte, si dhe personelin dhe sigurimin fizik që punon në Terminale. Greva është pjesë e përplasjes së vazhdueshme lidhur me pagat dhe kushtet e punës.

Operatori i Aeroportit të Frankfurtit, më i ngarkuari në Gjermani, ka bërë të ditur se asnjë fluturim pasagjerësh nuk do të realizohet nga pistat e tij të hënën. Pritet të preken edhe fluturimet transitore.

Prej 1,116 fluturimeve, 1,050 janë anuluar tashmë dhe numri pritet të rritet.

Operatori i Aeroportit ka thënë se vonesat dhe anulimet mund të vazhdojnë edhe të martën.

Grupi Lufthansa, që ka shumicën e fluturimeve në Aeroportin e Frankfurtit, ka konfirmuar se po përballet me “vonesa dhe anulime të mëdha” në mbarë linjat e saj fluturuese. Këto vonesa e anulime përfshijnë fluturimet e “Lufthanës”, “Eurowingsit”, “Austrian Airlinesit” dhe “Swiss International Air Lines”.

Përgatiti: Rexhep Maloku – Kallxo.com