Prodhim i veçantë Djathë i mykur nga Gollaku

Pasioni për djathin ka shtyrë Florentin Eminin nga Prishtina që ta prodhojë atë në një formë tjetër.

44-vjeçari nga Keçekolla, ku edhe gjendet punëtoria e tij, tash e një vit i përkushtohet prodhimit të djathit artizanal.

Ai në një intervistë për KALLXO.com tregon se djathi i vjetërsuar apo i mykur garanton cilësi dhe shije të veçantë.

Florentini tregon procesin e prodhimit, i cili fillon nga qumështi i fermerëve nga zona e Gollakut.

“Hapi i parë që bëhet këtu është transferimi i qumështit. Qumështin e marr prej fermerëve afër këtu në zonën e Gollakut. E transferoj vet. Transferi i qumështit bëhet në këtë kazan”, fillon të tregojë ai procedurat e prodhimit që nga kazani.

“Pasi të transferohet këtu, pasterizohet në pasterizim të ulët, nuk po hy në detaje në sa gradë. Pastaj i shtohet starter kultura që janë këto d.m.th. probiotikët e ndryshëm që i japin djathit shije. Pasi që të kryhet ato shkojnë seksione të ndryshme që duhet me prit me kohë edhe me kontrollu edhe shtohet maja e djathit. Ajo maja e djathit shërben për kuakulu. D.m.th. kuakulohet qumështi, pastaj prehet – ndahet ajo pjesa e ujit dhe jetë pjesa e djathit”, tha ai.

“Pas kësaj, këta [qumështin] e lëmë me mbërri temperaturën e caktume edhe me i kry të gjitha procedurat. Prej kësaj transferohet në kallëpet që është bë para gjysmë ore. Ky është djathë taze. D.m.th. nuk ka kripë, s’ ka kurrgjë veç djathë i pastër. Për momentin jemi në fazën e shtypjes. Kjo ka nevojë ende me u shtyp, se nuk guxon me i mbet asnjë pjesë e çame se mundet me i depërtu myku brenda dhe mundet me e prishë”, tregon Emini.

Pas kësaj, procesi vazhdon në një vend tjetër, të cilin ai e quan shpellë të djathit. Në këtë vend, ai thotë se djathi qëndron deri në një vit ku edhe vjetërsohet.

Gjatë vjetërsimit, ai tregon se çdo dy javë e pastron djathin me ujë me qëllim të largimit të mykut.

“Shpella e djathit është e bërë nën dhe i ka përafërsisht dy metra dhe përmbi është e mbulune tërësisht. Kjo e run temperaturën gjatë verës edhe dimrit, e mban temperaturën e njëjtë 13 deri 15 gradë. Nuk ka ndryshime drastike dhe ajo është temperaturë ideale ku vjetërohet djathi”, tha ai.

Florentini rrëfen se ka testuar deri në 40 lloje të djathërave. Ai thotë se prodhohen djathëra zvicerane, italiane e djathëra të tjera.

“Këto shumica janë djathëra të forta, d.m.th. familje parmëzave, kam edhe disa pak më të buta, zvicerane, ‘gruyere’ përdoret për rakletë që shkrihet po ajo është më specifike. I kam bërë një kallaballëk lloje. Janë 10 lloje që i kam testu që dy vjet. 37 deri 38 lloje janë që i kam testu, i kam ba vet”, shprehet ai.

Por, ai më tej tregon se për momentin nga ferma Florentin’s Cheese prodhohen pesë lloje djathërash.

“Jam fokusu në katër-pesë lloje që tregu jonë po i konsumon ma shumë. Është një lloj – cheddar. E ka një shije që duhet me ndejtë minimumi gjashtë muj ose sa më shumë që rrin vjen tu u ba ma i mirë. Ky është me kopër, ky është kaçkavall i thjeshtë. Ajo pjesa anej është me ‘dragon cheese’, është d.m.th. me spec djegës – përmban biber të zi, kokërr biberi, farë mustardë dhe komponente tjera që e ka një shije më specifike për njerëzit që e donë të ndryshme”, thotë ai.

Këto lloje të djathërave mund të blihen përmes llogarive në rrjete sociale të Florentin’s Cheese, dhe në disa markete të caktuara në Prishtinë.