Foto: Urim Krasniqi/KALLXO.com
Auditori i Përgjithshëm gjen mangësi në procedimin e pagesave në ShSKUK
11 raste të pagesave në Shërbimin Spitalor Klinik dhe Universitar të Kosovës gjatë vitit 2022 nuk janë proceduar sipas renditjes së duhur që e parasheh Rregulla Financiare për Shpenzimin e Parasë Publike.
Neni 22 thotë se fillimisht duhet të procedohet zotimi i mjeteve, të lëshohet urdhër-blerja, dhe pas pranimit të mallit bëhet raporti i pranimit, si dhe pranohet fatura.
Zyra Kombëtare e Auditorit ka gjetur se në 11 raste në vlerë prej mbi 2 milionë eurosh, zotimi i mjeteve ishte bërë pas nënshkrimit të kontratave dhe urdhër blerjet ishin bërë pas pranimit të faturave.
Dobësitë në procedimin e pagesave, sipas auditorit kanë ndodhur si rezultat i kontrolleve të dobëta në procesin e realizimit të blerjeve.
“Mosaplikimi i procedurave të duhura të kontrollit gjatë procesit të pagesave, mund të ndikojë që SHSKUK mos t’i kryejë obligimet e faturuara me kohë, dhe rrjedhimisht në rritjen e obligimeve të papaguara, të cilat do të jenë barrë për buxhetin pasues” – thuhet në këtë raport.
Rekomandimi i ZKA-së është që Bordi Drejtues dhe Drejtori i Përgjithshëm duhet të forcojnë kontrollet e brendshme dhe të kërkojnë zbatimin e procedurave nga zyrtarët përgjegjës, duke filluar nga inicimi i shpenzimeve deri në kryerjen përfundimtare të pagesave.
Sipas raportit, me këtë gjetje është pajtuar edhe menaxhmenti i SHSKUK-së.