Kombëtarja e Kosovës në basketboll sot përballet me Azerbajxhanin
Kombëtarja e Kosovës në basketboll sot do të zhvillojë ndeshjen e radhës me Azerbajxhanin, në kuadër të parakualifikimeve evropiane për FIBA Kupën e Botës 2027.
Ndeshja do të zhvillohet në ora 11:00 me kohën tonë lokale, në Baku të Azerbajxhanit.
Kosova të enjten mundi Irlandën 83:75 në ndeshjen që u zhvillua në Prishtinë.
Për shkak të lëndimit nuk janë grumbulluar lojtarët Lis Shoshi, Erjon Kastrati dhe Domenic Artis, kurse Jan Palokaj për shkak të dokumentacionit.
Raundi i parë parakualifikues i Kupës së Botës të Basketbollit FIBA 2027 do të luhet në tre dritare më 19-27 shkurt 2024, 18-26 nëntor 2024 dhe 17-25 shkurt 2025, nga një ndeshje në shtëpi dhe jashtë.
Të tre fituesit e grupeve së bashku me skuadrën e renditur më të mirë në vendin e dytë do të kalojnë në raundin e dytë parakualifikues të Kupës së Botës 2027 të FIBA-s, i cili do të luhet në verën e vitit 2025.
