Shpallet i Pafajshëm Inspektori i Minierave dhe Mineraleve
Gjykata Themelore në Pejë sot liroi nga të gjitha akuzat Lulzim Çitakun, Inspektorin e Minierave dhe Mineraleve të Kosovës.
Çitaku akuzohej nga Prokuroria Themelore në Pejë për veprat penale marrje e ryshfetit, ndaj të dëmtuarit Bedri Elezaj, pronar i kompanisë së reparacionit të zhavorrit “Elezaj SH.P.K”, dhe keqpërdorim i detyrës zyrtare ndaj kompanive të zhavorrit në regjionin e Pejës.
Pas mbajtjes së shqyrtimit kryesor, dhe fjalës përfundimtare të palëve ditën e djeshme, trupi gjykues në përbërje prej Sylë Lokaj, Nushe Kukaj-Mekaj, dhe Murat Hulaj, bëri shpalljen e aktgjykimit.
“I akuzuari lirohet nga të gjitha pikat e aktakuzës, për shkak se nuk është provuar se ka kryer vepër penale, për veprat penale për të cilat akuzohet, ndërsa shpenzimet e procedurës penale i ngarkohen me mjete buxhetore kësaj gjykate”, tha Sylë Lokaj.
Më tutje Lokaj theksoi se palët e dëmtuara mund të parashtrojnë kërkesë në kontest civil, brenda afatit prej 15 ditësh nga dita kur aktgjykimi të marrë formën e prerë.
I kënaqur dhe i emocionuar me vendimin e gjykatës, u duk edhe tanimë i liruari Lulzim Çitaku, i cili vendimin e gjykatës e vlerësoi si fitore të drejtësisë.
“Ndihem shumë i lumtur dhe krenar që ngadhënjeu drejtësia. U dëshmua me argumente shumë kokëforta që nuk qenë i involvuar në asnjë rast dhe asnjë moment në shkelje të ligjit”, tha Çitaku
Ai shtoi se nuk ndien urrejtje për askënd dhe se shpreson ne ushtrimin e profesionit që e ka ushtruar deri me tani.
Në shpalljen e aktgjykimit nuk ishte e pranishme prokurorja Sahide Gashi, e cila dje kërkoi dënim maksimal sipas ligjit për Çitakun.
Lulëzim Çitaku është arrestuar së bashku me Nuredin Bislimin pasi janë zënë duke marrë nga 500 euro mito nga Bedri Elezaj pronar i një separacioni të zhavorit.
Bedri Elezaj kishte rrëfyer për gazetën Jeta në Kosovë se si dy inspektorët i kishin kërkuar para.
Nuredin Bislimi ka pranuar fajësinë për marrjen e parave dhe është dënuar me 10 muaj burgim nga Gjykata Themelore në Pejë.
Muajin e kaluar, Gjykata e Apelit e hodhi poshtë ankesën e mbrojtjes së Nuredin Bislimit duke e vërtetuar vendimin e Gjykatës Themelore për kohëzgjatjen e dënimit.