Avion në Aeroportin "Adem Jashari" - Foto: KALLXO.com

Problemet teknike, aeroplani i nisur për në Prishtinë devijon në Zagreb

Autoriteti i Aviacionit Civil të Kosovës ka informuar se gjatë ditës së djeshme një avion i nisur nga Shtutgarti për në Prishtinë, për shkak të problemeve teknike është detyruar të aterojë në Zagreb.

“Autoriteti i Aviacionit Civil të Kosovës publikun e gjerë dje se fluturimi me nr. VBB3208, i nisur nga Shtutgarti për në Prishtinë, i realizuar nga aeroplani i kompanisë ajrore të Bashkimit Europian, ALK Airlines është detyruar të bëjë një devijim për në aeroportin e Zagrebit për shkak të problemeve teknike gjatë fluturimit, dhe ka aterruar pa problem në këtë aeroport rreth orës 18.00. Udhëtarët janë sjellur në ANP “Adem Jashari ” me një aeroplan tjetër të kësaj kompanie ajrore në ora 02:40 min pas mesnate”, është bërë e ditur përmes një komunikate për media.

Tuje Aviacioni Civil thekson se transporti ajror rregullohet në bazë të Marrëveshjes për Themelimin e Hapësirës së Përbashkët Evropiane të Aviacionit (HPEA), palë e së cilës është edhe Kosova që nga viti 2006,  dhe se e ka të garantuar lirinë e trafikut ajror.

“Kjo nënkupton që Certifikatat e Operimit Ajror, Licencat e Operimit dhe Certifikatat e Vlefshmërisë Ajrore të kompanive ajrore të cilat lëshohen nga një shtet nënshkrues i kësaj marrëveshje, janë të vlefshme edhe për vendet tjera nënshkruese të marrëveshjes HPEA, përfshirë këtu edhe Republikën e Kosovës. Përderisa një aeroplan posedon certifikatën e vlefshmërisë ajrore të lëshuar nga autoritetet kompetente të shteteve të Marrëveshjes HPEA, Autoriteti i Aviacionit Civil të Kosovës nuk ka të drejtë të ndaloj fluturimin e tyre në Republikën e Kosovës, përvec nëse gjatë kontrollimit në platformë vërehen jo konformitete me standardet e sigurisë”, thuhet në njoftim.

Autoriteti i Aviacionit Civil i Kosovës ka siguruar se është duke bërë inspektime të vazhdueshme të transportuesve të huaj ajror në ANP “Adem Jashari” për t’u siguruar që transporti ajror në vend të jetë sa më i sigurtë dhe në përputhje me normat ndërkombëtare të aviacionit civil.