Dëshmitarë të Rinj në Rastin “Reshtani”

Në Gjykatën Themelore në Prizren për sot ishte paraparë të jepej fjala përfundimtare në rastin “Reshtani”, mirëpo, pasi që Nuhi Kryeziu (babai i viktimës, Burim Kryeziu) kishte dorëzuar një kërkesë për dëgjimin e dëshmitarëve të rinj në këtë proces, kërkesë të cilën e mbështeti edhe avokati i tij, seanca nuk u mbajt.

Para se të fillojë seanca, trupi gjykues i njoftoi palët më një kërkesë të tillë. Pala akuzuese dhe avokati i të akuzuarit Fadil Shala, Ethem Rugova, nuk e kundërshtuan, siç u tha “për hir të zbardhjes të së vërtetës”.

Përfaqësuesi i palës së dëmtuar, avokati Hajrip Krasniqi tha se arsyeja pse është bërë një kërkesë e tillë është për faktin se këta dëshmitarë mund të kontribuojnë në ndriçimin e çështjes.

“Kërkesës së tillë ne si mbrojtje i kemi dhënë mbështetje. Këtë kërkesë nuk e kundërshtoi as prokuroria e çështjes. Dëgjimin e dëshmitarëve nuk e kundërshtoi as Ethem Rugova, avokati i të akuzuarit Fadil Shala, të cilët i dhanë përkrahje me shpresën se do të kontribuojë në ndriçimin e rastit”, tha avokati Hajrip Krasniqi.

Mirëpo, në emër të mbrojtësve të të akuzuarve Enver e Artan Kryeziu, kërkesën e kundërshtoi avokatja Kosovare Kelmendi, pasi që, sipas saj, dëshmitarit Nuhi Kryeziu është duke iu mundësuar një status i privilegjuar.

“Mbrojtja konsideron se dëshmitarit Nuhi Kryeziu është duke iu mundësuar një status i privilegjuar në kundërshtim me ligjin, për faktin se dëshmitari nuk gëzon asnjë të drejtë për të propozuar dëshmitar apo prova materiale”, tha avokatja Kelmendi.

Trupi gjykues e aprovoi kërkesën e palës mbrojtëse për dëshminë e dëshmitarëve të rinj. Fjala është për policët, të cilët në ditën kritike kanë shkuar të parët në vendngjarje, ndërsa lidhur me kërkesën e avokatit të të akuzuarit Fadil Shala për ekspertizë neuropsikiatrike do të vendoset në seancat e ardhshme, që janë caktuar të mbahen më 12 dhe 13 prill.

Fadil Shala, i cili akuzohet për vrasje, është shpallur fajtor për këtë vepër penale dhe është dënuar me 15 vjet burgim. Ndërsa, Enver e Artan Kryeziu, janë dënuar për këtë vepër penale me nga 13 vjet burgim më 11 shtator 2014.

Gjykata e Apelit e ka kthyer në rigjykim këtë rast.

Ngjarja për të cilin po zhvillohet ky gjykim ka ndodhur më 2 gusht 2012 në Reshtan të Suharekës.

http://kallxo.com/mungon-prokurorja-ne-gjykimin-per-perleshjen-ne-reshtan/