Një numër i madh njerëzish jetojnë me presion të lartë të gjakut
Hipertensioni është një epidemi e heshtur globale që prek më shumë se 1.3 miliardë njerëz në botë dhe pothuajse gjysma e tyre nuk e dinë as që presioni i gjakut është i lartë. Ata që e dinë se kanë presion të lartë të gjakut mund t’i ndërmarrin tre hapa për ta mbajtur nën kontroll gjendjen e tyre dhe për ta minimizuar rrezikun e sëmundjeve të zemrës.
Ushtroni, shmangni kripën, mos pini duhan
Këshillat e zakonshme për një mënyrë jetese të shëndetshme shkojnë dyfish nëse dëshironi ta shmangni sulmin në zemër, demencën, dështimin e veshkave dhe gjendje të tjera shëndetësore që mund të shkaktohen nga presioni i gjakut i neglizhuar. Kjo do të thotë shumë stërvitje, një dietë të ekuilibruar, pak kripë dhe një jetë pa cigare. Një mënyrë jetese e shëndetshme do t’ju ndihmojë gjithashtu ta reduktoni nevojën për ilaçe për presionin e gjakut.
Sportet e qëndrueshmërisë, të tilla si çiklizmi, ecja ose noti janë më të mirat, në mënyrë ideale të paktën tri herë në javë për 30 deri në 45 minuta. Është më mirë ta shmangni mbingarkesën e sistemit kardiovaskular. Nëse dilni për vrap, për shembull, përpiquni të mos vraponi deri në pikën ku mezi mund të merrni frymë.
Kontrolle të rregullta
Nëse e dini se keni presion të lartë të gjakut, duhet ta matni tensionin rregullisht, për shembull një herë në javë ose çdo muaj. Është më mirë ta diskutoni këtë me mjekun tuaj. Gjatë matjes në shtëpi, vlerat zakonisht janë më të ulëta se te mjeku. Kjo për shkak se shumë njerëz në zyrë janë pak të shqetësuar, gjë që bën që presioni të rritet.
Shkrimi i vlerave në një ditar ose aplikacion është një ide e mirë. Edhe nëse ndiheni mirë si pacient me hipertension, mjeku juaj duhet ta masë presionin e gjakut në mënyrë periodike, për shembull çdo gjashtë muaj.
Mos e ndaloni marrjen e ilaçeve
Ilaçet duhet të merren saktësisht siç përshkruhet nga mjeku. Kjo do të thotë që edhe nëse ndiheni mirë, nuk duhet ta ulni dozën – të paktën jo pa dritën jeshile të mjekut tuaj.
Kushdo që merr frenues ACE, sartan ose diuretikë duhet ta kontrollojë rregullisht funksionin e veshkave dhe nivelet e kaliumit. Kjo ndodh sepse këto barna që përdoren për trajtimin e presionit të lartë të gjakut mund t’i dëmtojnë veshkat. Ekspertët e shëndetit të zemrës e këshillojnë ekzaminimin një herë para fillimit të terapisë, katër javë pas, pas tre muajsh dhe më pas çdo gjashtë muaj./Index.hr
Përgatiti: Nuhi Shala
