Analizë: Xhiroja e 32-të nën hijen e ndeshjes Llapi- Feronikeli (FOTO)
Mesjava në Kosovë do të jetë e rezervuar për futbollin kosovar.
Të mërkurën dhe të enjten do të zhvillohet xhiroja e 32-të e IPKO Superligës së Kosovës.
Kjo xhiro mund të definojë shumëçka, si për çështjen e titullit, ashtu edhe për zonën e barazhit, pasi tashmë dy vendet që i dërgojnë direkt në Ligën e Parë janë “siguruar” nga KEK-u dhe Liria, ekipe të cilat janë dorëzuar para kohës.
Ndeshja kryesore e kësaj xhiroje do të jetë ajo ndërmjet Llapit dhe Feronikelit që zhvillohet në stadiumin “Zahir Pajaziti” në Podujevë të mërkurën prej orës 16:00.
Llapi me humbjen ndaj Prishtinës në xhiron e kaluar në stadiumin “Fadil Vokrri”, ka ngecur në luftën për titull, pasi nga vendi i parë është pesë pikë mbrapa që e mban Feronikeli.
Kurse Feronikeli është në pozitën e parë me 74 pikë, dy më shumë se Prishtina që është në vend të dytë.
Matematikisht Llapi është ende në lojë për titullin e kampionit, nëse fiton ndeshjen e nesërme ndaj Feronikelit.
Ndërsa, nëse Feronikeli nesër shënon fitore, atëherë në xhiron e fundit ndaj Prishtinës do t’i mjaftonte një barazim që të shpallej kampion.
Në pesë ndeshjet e fundit të dy ekipet e kanë nga një humbje dhe katër fitore.
Dy takimet e fundit brenda këtij sezoni Feronikeli e ka mposhtur Llapin në të dy ndeshjet.
Në Drenas me rezultat 2-0, kurse në Podujevë me rezultat 1-0.
Tjetër ndeshje e rëndësishme për kreun e tabelës zhvillohet edhe nesër ndërmjet Prishtinës dhe Trepçës ’89, në stadiumin “Fadil Vokrri”, prej orës 16:00.
Në këtë ndeshje të dy ekipet kanë synime të ndryshme, Prishtina për titullin e kampionit, ndërsa Trepça ’89 në luftë për mbijetesë.
Prishtina ndodhet në vendin e dytë me 72 pikë, dy pikë më pak se lideri Feronikeli.
Ndërsa mitrovicasit ndodhen në vendin e tetë me 39 pikë, aq pikë sa ka edhe Flamurtari që është në vendin e nëntë, pozitë që e fut në zonën e barazhit.
Prishtinës i duhet fitorja për të mbetur në garë për titull, pasi në xhiron e fundit luan në Drenas, ndaj Feronikelit.
Trepça ’89 duhet të fitojë nëse dëshiron që mos t’i humbas gjasat për të dalë nga zona e barazhit.
Përballjen e fundit ndërmjet këtyre dy ekipeve e kishte fituar Trepça ’89 në kuadër të Kupës së Kosovës.
Drenica – Ballkani, ndeshje e cila do të zhvillohet në Skenderaj, do të jetë esenciale për të dy ekipet, pasi humbja njërin ekip do ta dërgonte në barazh.
Drenica aktualisht është në vendin e gjashtë me 39 pikë, po aq pikë ka edhe Ballkani në vendin e shtatë.
Ndeshjen e fundit me 16 shkurt të këtij viti, Ballkani e kishte fituar me rezultat 2-0.
Formë të mirë nga pesë ndeshjet e fundit ka Ballkani, ku i ka regjistruar dy fitore, një barazim dhe dy humbje.
Kurse Drenica vetëm dy barazime dhe tri humbje.
Drita e akomoduar në pozitën e katërt me 48 pikë dhe pa ndonjë synim për këtë sezon do ta pres Flamurtarin në Gjilan.
Pra siç e thamë, kampionët aktual të Superligës, nesër do të luajnë pa presion edhe nëse e humbin ndeshjen, barazojnë apo fitojnë.
Ndërsa për Flamurtarin e drejtuar nga Arsim Thaqi, kjo përballje është decizive, pasi gjenden në pozitën e nëntë me 39 pikë, pozitë kjo që njihet ndryshe si zona e barazhit, pasi duhet ta luaj një ndeshje pas përfundimit të kampionatit me njërin prej ekipeve të Ligës së Parë, për ta parë se a do të mbetet në Superligë.
Drita në pesë ndeshjet e fundit i ka marrë tre barazime dhe dy humbje.
Kurse Flamurtari tri fitore, një barazim dhe një humbje.
Përballjen e fundit ndërmjet këtyre dy ekipeve e kishte fituar Drita me rezultat 1-0, në Prishtinë.
Gjilani do ta pres Lirinë e cila tashmë është përshëndetur me Superligën, mirëpo as këta vet nuk i kanë punët mirë, pasi pozicionohen në vendin e 10-të me 35 pikë.
Skuadra e Gjilanit që tetë ndeshje nuk di për fitore dhe në dy xhirot e fundit, duhet t’i fitoj të dy takimet që të ketë mundësi t’i ikë zonës së barazhit.
Gjilani në dy takimet e fundit me Lirinë e ka marrë një barazim dhe një humbje.
Në pesë ndeshjet e fundit, Gjilani i ka të gjitha humbje. Kurse Liria tri humbje, një barazim dhe një fitore.
Kjo ndeshje luhet të enjten prej orës 16:00, në Gjilan.
KEK-u do ta pres Ferizajn e ringjallur nga trajneri Bylbyl Sokoli.
Elektricistët tanimë janë pjesë e Ligës së Parë, pasi janë në vendin e fundit me vetëm një pikë.
Kurse Ferizaj i Bylbyl Sokolit është ringjallur duke u ngritur në vendin e pestë me 40 pikë.
Ferizajt i duhet fitorja që ta sigurojë edhe matematikisht mbetjen në Superligë për sezonin e ri.
Në pesë ndeshjet e fundit KEK-u i ka të gjitha humbje.
Ndërsa Ferizaj i ka të gjitha fitore, si asnjë skuadër tjetër në Superligë.
Dy takimet e fundit ndërmjet këtyre dy ekipeve i ka fituar Ferizaj.
Nëse i shikojmë të gjitha takimet që zhvillohen në këtë sezon, kjo xhiro mund të na sjellë kampionin e ri për sezonin 2018/2019, nëse Feronikeli fiton ndaj Llapit në Podujevë e Prishtina lëshon pikë ndaj Trepçës ’89 në Prishtinë.
Edhe lufta për zonën e barazhit do të qartësohet pas kësaj xhiroje, ku skuadrave si Feronikeli, Prishtina, Llapi e Drita, do të bëhet e ditur se cilat skuadra do t’i bashkohen.
Xhiroja e fundit do të zhvillohet të shtunën ose të dielën, ku edhe përfundimisht do të përcaktohet gjithçka.