Vrasja e dy vëllezërve në Kosuriq të Pejës, nëna e viktimave i shkon te babai gjykatësit
Ka dështuar të mbahet gjykimi për vrasjen e dy vëllezërve Berisha në fshatin Kosuriq të Pejës, për të cilën vrasje po akuzohet Binak Panxha.
Kryetari i trupit gjykues Sami Sharraxhiu, tha se nëna e viktimave, Shake Berisha ka shkuar në shtëpinë e babait të tij me qellim që të kërkoj nga ai ndihmë që i biri, këtu gjyqtari të jetë objektiv në këtë çështje penale.
“Shakë Berisha ka shkuar në shtëpinë e babait tim, duke i thënë se unë e kam një lëndë te djali yt Sami Sharraxhiu, kërkoj të më ndihmosh se mi kanë vra dy djemtë e po dojnë mem qit prej shtëpisë”, tha gjyqtari Sami Sharraxhiu.
Gjykatësi tha se babai i tij e ka larguar nga shtëpia duke i thënë të dëmtuarës se “Ke gabuar që ke ardhur këtu”.
Pasur parasysh këto rrethana gjykatësi tha se do të dërgoj lëndën të kryetari i Gjykatës së Apelit që të vlerësojë a mund ai si kryetar i trupit gjykues të vazhdoj gjykimin në këtë çështje penale.
Ndërsa, e dëmtuara Shake Berisha tha se ka shkuar në shtëpinë e babit të gjykatësit që t`i kërkoj ndihmë, sepse sipas saj djali i tij këtu gjykatësi Sami Sharraxhiu po bën padrejtësi.
“Unë edhe pse kam shkuar çka ka lidhje, kom dashtë mi tregu që djali yt po më bën padrejtësi e merru me to, thuaja dy tri fjalë le të punon drejt, as si kom ra, as se kom shajt, veç kam kërkuar mem ndihmu”, tha Shake Berisha.
Prokurori i shtetit Agron Galani dhe mbrojtësi i të akuzuarit Binak Panxha, avokati Osman Cucoviç, po ashtu u pajtuan që të pritet një vendim i kryetarit të Gjykatës së Apelit.
Seanca e radhës është shtyre në afat të pacaktuar, deri në një vendim të Gjykatës së Apelit.
Prokuroria e Pejës e akuzon Binak Panxhën se shkaku i prerjes së pyllit, me dashje i ka privuar nga jeta dy vëllezërit Ramiz dhe Arsim Berishën.
Në aktakuzë thuhet se dy viktimat së bashku me shokun e tyre Jetlir Gashin ishin nisur me kuaj në pyll për të prerë dru. Pasi i parkojnë qerret buzë rrugës dhe futen në pyll (pronë e të pandehurit) për të prerë dru, pas disa çastesh viktima Arsim dëgjohet duke thirrur: “Kush hamami jeni ju”? dhe në atë moment i pandehuri Binak Panxha nga arma automatike shkrep 3 herë e më pas shkrep rafal 11 herë, duke i privuar kështu nga jeta tani të ndjerët.
Pas aktit, në aktakuzë thuhet se i akuzuari i largon trupat e të ndjerëve duke i tërhequr përafërsisht 61 metra nga vendi i ngjarjes, me ç’rast i vendos në pjesën e tokës pa pronar.
Arsim e Ramiz Berisha u vranë në Kosuriq të Pejës më 22 korrik të vitit 2017.
