Zenun Elezaj përballë premtimeve të tij në Jeta në Komunë - VIDEO
Kryetari i Klinës, Zenun Elezaj, në vitin 2021 kur garonte për mandatin e radhës, kishte dhënë disa premtime për këtë komunë të cilat do t’i realizonte disa brenda mandatit e disa në kohë edhe më të shkurtë.
Për këto premtime Elezaj u përball në debatin “Jeta në Komunë” me hulumtimin e ekipit të KALLXO.com, i cili për secilën fjalë të dhënë të kryetarit kishte dalë në terren për ta verifikuar.
Videomateriali filloi me premtimin e Elezajt se në vitin 2023 do të ketë ujë të pijes për fshatrat e Klinës, duke e bërë filtrimin e ujit përmes projektit të fundërruesit.
Krypometri gjeti se Klina ende nuk e ka zgjidhë çështjen e ujit të pijes dhe se projekti i fundërruesit ka nisur. Elezaj dha një premtim tjetër – punimet në këtë projekt që e bën ujin të pijshëm do të përfundojë këtë vit.
“Në kontratë parashihet që të përfundojë në muajin nëntor punimet, dhe pastaj fillon me fazë testuese” – tha Elezaj në “Jeta në Komunë” më 12.10.2024 duke shpjeguar se fundërruesi ka kapacitet përreth 100 litra në sekond dhe se parashihet të mbulojë qytetin e Klinës dhe fshatrat përreth. “Ndërsa pjesa tjetër do të mbulohet nga burimi i Jarinjës, mirëpo ende nuk është trajtu”.
Një premtim i parealizuar deri më tani është ai i drejtoreshave në kabinetin e tij.
“Në mandatin e ardhshëm, minimum do t’i emërojë 30% gra, por do të synojë 50%” – ishin fjalët e Zenun Elezajt më 08.10.2021 në DebatPërnime përballë kundërkandidatëve të tjerë në garën për të parin e Klinës.
Krypometri e vulosi “rrenë” këtë fjalë të dhënë sepse aktualisht asnjë grua nuk udhëheq me ndonjë drejtori në Klinë. Nga Komuna u arsyetuan me faktin se numri dy i Komunës, i takon një gruaje, pra është një nënkryetare.
“Nuk është që nuk kemi kuadro nga gjinia femërore, kemi gjithësesi. Na e kemi pasë një drejtoreshë por që është dorëheqë për shkaqe familjare. Jam mundu…” – tha Elezaj.
Videomateriali shpalosi edhe se lista e uzurpatorëve nuk është publike ende, ndonëse ishte premtuar se “do të botohet”.
“Ka probleme kadastrale të mëdha. Por duhet punë, angazhim e saktësi, por besoj se së shpejti” – u arsyetua kryetari Elezaj në “Jeta në Komunë”.
Ndërsa, projekti i stacionit të autobusëve është realizuar. Mirëpo, ndërmarrja e cila ishte premtuar se do të themelohet për ta menaxhuar stacionin e autobusëve nuk është realizuar ende. Për këtë, kryetari Elezaj fajin ia hodhi Qeverisë.
“Kemi pasë tri ndërmarrje me i themelu, mirëpo nuk kemi arritë për shkak të mosmbështetjes nga ministria e linjës [Ministria e Ekonomisë]. I kemi dërgu edhe propozimet… as nuk përgjigjen fare [nga Ministria] – tha Elezaj.
Në anën tjetër, gjatë kohës sa po kandidonte për kryetar, Elezaj ksishte dhënë premtime edhe për fushën e arsimit.
Shkolla fillore “Motrat Qirazi” në Klinë është rinovuar, ndërsa shkolla e re në fshatin Zllakuqan nuk u ndërtua ende e reja.
Po ashtu, premtimi se do të ketë mësim tërëditor në një shkollë me gjithë infrastrukturën e nevojshme, krypometri gjeti se kjo ende nuk është realizuar.
