Viktor Orban: Trump do t'i japë fund luftës në Ukrainë duke mos dhënë 'asnjë qindarkë' për këtë të fundit

Kryeministri hungarez Viktor Orbán e ka shprehur besimin e tij se nëse ish presidenti Donald Trump kthehet në detyrën e presidentit të SHBA-së në muajin nëntor, lufta ruso-ukrainase do të marrë fund pasi Trump do t’i ndërpresë fondet për Kievin. 

Vërejtjet e Orbanit, të bëra në një intervistë me transmetuesin hungarez M1, nënvizojnë qëndrimin e supozuar të Trump për konfliktin, duke pohuar se Ukrainës i mungojnë burimet për ta mbajtur veten pa ndihmë të jashtme.

Komentet e Orbanit pasuan një takim midis Trump dhe tij në Mar-a-Lago, i përshkruar si një “takim shoqëror” pa axhendë specifike. Orbán ka qenë një kundërshtar i vazhdueshëm i përpjekjeve të Bashkimit Evropian dhe NATO-s për ta ndihmuar Ukrainën që nga pushtimi i Rusisë, duke avokuar për një ndërprerje të ndihmës perëndimore për t’i dhënë fund konfliktit.

Duke e riformuluar qëndrimin e tij si “pro-paqe”, Orbán e justifikon pozicionin e tij pavarësisht se në mënyrë efektive e shpërblen Moskën për agresionin e saj kundër Ukrainës. 

Trump, i cili e siguroi nominimin republikan për president, përafrohet me një qasje të ngjashme izolacioniste, duke u zotuar se do t’i japë fund luftës në Ukrainë brenda 24 orëve nëse zgjedhet, një lëvizje që kritikët argumentojnë se do t’i shërbente vetëm interesave të Putinit.

Orbán dhe Trump, të dy të karakterizuar si popullistë të ekstremit të djathtë, e kanë ruajtur një admirim të ndërsjellë, pavarësisht kritikave për gërryerjen e institucioneve demokratike nga Orban në Hungari. 

Janë ngritur shqetësime për mbështetjen e palëkundur të Trump për liderët autokratë si Orbán dhe Putin, me disa që kanë frikë se një mandat i dytë i mundshëm do të çonte në një ndryshim të rëndësishëm në rolin global të Amerikës, ndoshta duke përfshirë tërheqjen nga NATO dhe zbehjen e angazhimit ndaj aleancave të mbrojtjes.

Ish-këshilltarët e Trump kanë treguar për lavdërimin e vazhdueshëm të ish presidentit Trump për autokratët dhe sugjerojnë se një kthim në pushtet mund të shënojë një largim të rëndësishëm nga politika e jashtme tradicionale e SHBA, duke paraqitur sfida për unitetin e demokracive perëndimore në mbështetjen e Ukrainës dhe ruajtjen e stabilitetit global./CNN

Përgatiti: Nuhi Shala