Sulmi në Stamboll: 22 persona të arrestuar - ministri turk i fajëson separatistët kurdë

Ministri i Brendshëm i Turqisë ka pohuar se Partia e Punëtorëve të Kurdistanit (PKK) është përgjegjëse për një shpërthim në një rrugë tregtare të frekuentuar në Stamboll që la të vrarë gjashtë persona të dielën. Policia ka arrestuar 22 të dyshuar, duke përfshirë personin që e ka vendosur bombën, sipas ministrit të brendshëm Suleyman Soylu.

Gjashtë persona vdiqën dhe 81 u plagosën kur rruga popullore e këmbësorëve İstiklal Avenue u godit nga një sulm me bombë, akt ky të cilin presidenti i Turqisë e përshkroi si një akt terrorist.

Soylu pretendon se urdhri për sulmin ishte dhënë në Kobani, një qytet në veri të Sirisë, ku forcat turke kanë kryer operacione kundër milicisë kurde siriane në vitet e fundit.

Ndërkohë që Stambolli qendror ka qenë në shënjestër të separatistëve kurdë dhe militantëve islamikë në të kaluarën e afërt, përgjegjësia mbi sulmin nuk është marrë përsipër zyrtarisht nga asnjë grup deri më tani.

PKK, e futur në listën e zezë si një grup terrorist nga Ankaraja si dhe aleatët e saj perëndimorë, ka mbajtur një kryengritje për vetëqeverisjen kurde në Turqinë juglindore që nga vitet 1980.

I shënjestruar rregullisht nga operacionet ushtarake turke, grupi është gjithashtu në qendër të një përleshjeje midis Suedisë dhe Turqisë, e cila e ka bllokuar hyrjen e Stokholmit në NATO që nga maji, duke e akuzuar atë për butësi ndaj PKK-së.

Turqia është goditur nga një varg bombardimesh vdekjeprurëse midis viteve 2015 dhe 2017 nga Shteti Islamik dhe grupet kurde të jashtëligjshme.

Ato përfshinin një sulm vetëvrasës me bombë në të njëjtën rrugë më 19 mars të vitit 2016, i cili vrau pesë persona dhe plagosi 36 të tjerë. Policia turke më vonë tha se sulmuesi kishte lidhje me IS.

Në janar të atij viti, një sulmues vetëvrasës në lagjen e frekuentuar Sultanahmet vrau 13 persona. Në qershor, sulmues të armatosur me armë automatike dhe breza eksplozivi sulmuan hyrjen e aeroportit Ataturk të Stambollit, duke vrarë 45 persona të tjerë përveç sulmuesve dhe duke plagosur më shumë se 230 të tjerë./The Guardian