Squire Patton Boggs: Fitorja e tretë në arbitrazh për Republikën e Kosovës

Firma ligjore amerikane “Squire Patton Boggs“ ka reaguar pas fitores së tretë të Kosovës në arbitrazh.

Nëpërmjet komunikatës, ka njoftuar se ka arritur një fitore të plotë për klientin e tij të kamotshëm Republikën e Kosovës, në një arbitrazh sipas rregullave të Dhomës Ndërkombëtare të Tregtisë (DHNK).

Mosmarrëveshja AS IuteCredit Europe / Republika e Kosovës, kishte të bënte me revokimin e licensës së institucionit mikrofinanciar që i ishte lëshuar filialit të paditësit në Kosovë dhe udhëhiqej nga Ligji i Kosovës për Investime të Huaja.

Sipas njoftimit, Squire Patton Boggs ka siguruar tashmë tre fitore radhazi në arbitrazh të investimeve për Republikën e Kosovës, duke i mbrojtur taksapaguesve kosovarë pothuajse gjysëm miliard euro në vlerë të padive” -thuhet në njoftimin e kësaj firme ligjore.

Gjithashtu bëhet e ditur se kush ishte pjesë e ekipit që fitoi rastin në arbitrazh

“Ekipi i Squire Patton Boggs u udhëhoq nga Luka Misetic (New York), Rostislav Pekar (Pragë) dhe Mark Stadnyk (Houston), bashkëpunëtori i lartë Matej Pustay (Pragë) dhe bashkëpunëtoret Fëllënza Limani, Mailis Meier-Lutterodt, Tamara Koresova dhe Helena Cech (të gjithë në Pragë)”- thuhet në njoftim.

Tutje thuhet se rasti përfshinte një numër çështjesh në lidhje me ligjshëmrinë e investimeve si në periudhën e bërjes së investimit ashtu edhe më pas.

“Përfundimisht, Tribunali arriti në konkluzionin se sjellja e paditësit nuk mjaftonte për të përjashtuar juridiksionin e tribunalit, mirëpo vendosi në favor të Kosovës për të gjithë pretendimet e saj në merita. Kësisoj tribunali pranoi argumentin e Kosovës se revokimi i licensës përbënte një ushtrim bona fide (në mirëbesim) të kompetencave rregullative të Kosovës dhe si i tillë nuk ishte arbitrar apo diskriminues por i ofronte paditësit një trajtim të rregullt dhe të drejtë. Në bazë të këtij përfundimi, tribunali hodhi poshtë të gjitha kërkesat e ngritura nga paditësi, përfshirë këtu pretendimet për shpronësim, shkelje të standartit për trajtim të drejtë dhe të paanshëm, shkelje të standartit për mbrojtje të plotë dhe siguri dhe shkelje të klauzolës ombrellë”.

Udhëheqësi ekipit Luka Misetic, citohet të jetë shprehur i kënaqur me këtë fitore.

“Jemi të kënaqur që kemi siguruar fitoren e tretë radhazi në arbitrazh të investimeve për popullin e Kosovës”- komentoi Misetic.

“Vendimi i arbitrazhit konfirmon se me revokimin e licencës së të paditurit me qëllim mbrojtjen e interesave të konsumatorëve dhe publikut të gjerë kosovar, Banka Qendrore e Kosovës ka vepruar në përputhje me starndartet vendore dhe ndërkombëtare”- citohet të ketë thënë Misetic.

Tribunali gjithashtu i ka njohur Kosovës të gjitha shpenzimet e arbitrazhit si dhe 20% të shpenzimeve të Kosovës.

Squire Patton Boggs e ka përfaqësuar Republikën e Kosovës në pesë arbitrazhe ndërkombëtare.

Ky rast është i tretë që ka arritur në një vendim përfundimtar.

I pari, ACP Axos v Republic of Kosovo, ka rezultuar në fitore të plotë për Kosovën duke mundur një padi në vlerë prej €380 milionë.

I dyti, Bedri Selmani – Republic of Kosovo, u nxorr në gusht 2022 dhe gjithashtu rezultoi në fitore të plotë për Kosovën, në një rast ku paditësi  kishte kërkuar mbi €45 milionë pa llogaritur kamatën.