Sot protestohet për të kundërshtuar rritjen e çmimit të energjisë elektrike

Nën moton “Asnjë cent më shumë”, sot pritet që të mbahet protesta qytetare kundër rritjes së çmimit për energji elektrike.

Tash e disa ditë ka nisur në rrjetin social Facebook fushata për të organizuar protestën kundër rritjes së çmimit për energjinë elektrike.

Iniciativa qytetare “Asnjë cent më shumë” në rrjetin social “Facebook” ka thënë se protesta do të mbahet për të kundërshtuar propozimin për rritjen e çmimit të energjisë elektrike me 15%, vendim ky që është paralajmëruar nga Zyra e Rregullatorit të Energjisë (ZRRE).

“Në këtë kohë kur kushtet ekonomike janë të rënda, papunësia e lartë dhe shumë familje mezi arrijnë të përballojnë shpenzimet bazike, një rritje e tillë është e padrejtë dhe e papranueshme”- thuhet në mesazhin e grupit organizator në Facebook.

Më 02.04.2025, Iniciativa qytetare “Asnjë cent më shumë”, që po kundërshton rritjen e çmimit të energjisë elektrike në Kosovë, ka thënë se iu kanë arrestuar 12 aktivistë, të cilët po protestonin para hyrjes së Zyrës së Rregullatorit të Energjisë (ZRRE) mëngjesin e sotëm, më 02.04.2025.

Përmes një postimi në rrjetin social Facebook kjo iniciativë ka thënë se në orën 08:00, kur edhe fillon orari zyrtar i punës së ZRrE-së, aktivistë të iniciativës kanë bllokuar Zyrat e ZRRE-së.

“Me zell të pakuptueshëm nga ana e pjesëtarëve të Policisë janë arrestuar dhe rrahur 12 aktivistë/e. Janë rrahur egërsisht vetëm pse po protestonin kundër rritjes edhe ashtu të rritur të çmimit të energjisë. Të rrahurit/at dhe të arrestuarit/at po mbahen në Polici. Ne kerkojmë lirimin e menjëhershëm të tyre, kurse qytetarët/et i ftojmë të na bashkohen te Zyret e ZRrE-së.” – thuhej në njoftimin e tyre.

Zyra e Rregullatorit të Energjisë Elektrike (ZRRE) ka njoftuar më 14.03.2025 për propozimin e shtrenjtimit të rrymës për 15% në Kosovë, pas dorëzimit të Raporteve të Kompanive KOSTT, KEDS dhe KESCO, në lidhje me të hyrat maksimale të lejuara.

Petrit Pepaj nga Zyra e Rregullatorit të Energjisë në një deklaratë në KallxoPërnime më 14.03.2025 kishte deklaruar se rritja e çmimit të rrymës nuk mund të shmanget për dy arsye.

“Rritja është e pashmangshme për shkak të kostove që kanë ndodhë. Përafërsisht 15% pritet me u rritë.” – ka deklaruar Pepaj.

“Janë dy shkaktarë kryesorë që e kanë pru këtë kosto: është mungesa e gjenerimit që ka qenë në vend; edhe në burime të ripërtëritshme që ka pasur në vend ka pasur mungesë të gjenerimit, edhe çmimet e importit. Këto e kanë shkaktuar rritjen e çmimit.” – tha ai.

Rritja e çmimit të energjisë elektrike është kundërshtuar nga Shoqëria civile në Kosovë, si nisma “Asnjë cent më shumë”, partitë politike si LDK, AAK dhe PDK.

Po ashtu, edhe Presidenca e Kosovës më 28.03.2025 përmes një komunikate për media, ka kundërshtuar propozimin për rritjen e çmimit të energjisë elektrike, nën arsyetimin se ky Propozim është në kundërshtim me Kornizën Ligjore, që e obligon Zyrën e Rregullatorit Ekonomik (ZRrE) të përkujdeset për mbrojtjen e konsumatorit dhe injoron situatën ekonomike dhe aspektin e mirëqenies në vend.

Kurse, Ministria e Ekonomisë ka propozuar që rritja e çmimit të rrymës të mos prekë amviseritë e që konsumojnë më pak se 800 kËh.