Shkon në gjashtë numri i të vrarëve nga sulmi në qendrën tregtare në Sidnej

Një person i gjashtë është konfirmuar i vdekur pas sulmit në qendrën tregtare në Sidnej, tha një zëdhënës i policisë së Uellsit të Ri Jugor.

Pesë u vranë në qendrën tregtare dhe një person ka vdekur në spital nga plagët e thikës, raporton CNN.

Sulmuesi u vra edhe nga një oficere policie në vendngjarje.

Oficerja e vrau e vetme sulmuesin e qendrës tregtare në Sidnej në katin e pestë të qendrës tregtare Bondi Junction Westfield, sipas ndihmës komisionerit të policisë së Uellsit të Ri Jugor, Anthony Cooke.

Cooke u tha gazetarëve se oficerja e policisë ishte afër. Ajo qëlloi autorin kur ai ngriti thikën ndaj saj.

“Ajo shkarkoi armën e saj të zjarrit dhe ai person tani ka vdekur” – tha Cooke.

E njëjta oficere u pa edhe në videot në mediat sociale duke dhënë ndihmën për ata që ishin lënduar.

Kryeministri i Australisë, Anthony Albanese, e përshkroi sulmin në qendrën tregtare në Sidnej si një “akt të tmerrshëm dhune që synon pa dallim njerëz të pafajshëm që kalojnë një të shtunë të zakonshme”.

Albanese nuk mundi të konfirmonte motivin e sulmuesit, por përgëzoi oficeren që u përball me autorin dhe e kapi atë. Ai tha, “ajo është padyshim një heroinë. Nuk ka dyshim se ajo shpëtoi jetë me veprimin e saj.”

Albanese tha se nuk kishte informacion për motivin e sulmuesit dhe se spekulimet nuk do të ishin të dobishme tani.

Komisioneri i Policisë Federale Australiane, Reece Kershaw, tha se Policia Federale Australiane dhe Organizata e Inteligjencës Australiane të Sigurisë po punonin në hetimin për të përcaktuar motivin e sulmuesit.

Përgatiti: Dorentina Kastrati