Rrëshqet një pjesë e gurëve rreth Liqenit Akumulues në Mitrovicë
Vërshimet e janarit kanë bërë që të ketë rrëshqitje të gurëve tek Liqeni Akumulues në Mitrovicë, derisa Komuna e Mitrovicës Jugore ende është në procedura për t’i rregulluar dëmet.
Drejtori i Drejtorisë së Shërbimeve Publike dhe Infrastrukturës, Granit Tmava ka thënë për KALLXO.com se kjo shembje ka ndodhur si pasojë e vërshimeve.
Tmava ka konfirmuar se tashmë kanë nisur procedurat për rregullimin e shtratit anash liqenit i cili është shembur.
“Na kemi nis procedurat për rregullimin e kësaj. Kjo ka ndodhë kur kanë qenë vërshimet në Mitrovicë. Është bërë edhe dëmtimi i bankinave dhe skarpateve te Liqeni Akumulues. Kur ka qenë vërshimet gjatë këtij viti ka ndodhë edhe dëmtimi në fjalë” – tha Tmava për KALLXO.com.
Drejtori Tmava ka konfirmuar se brenda këtij vitit të bëhet sanimi i dëmeve.
“Na e kemi bërë inspektimin në terren, e kemi pa sa është dëmi, e kemi bërë edhe vlerësimin e tyre. I kemi nis procedurat për rregullimin e dëmit dhe presim të sanohet brenda këtij viti. Jemi duke bërë rregullimin e shtatit të lumit. I njëjti operator i cili është duke punuar, i kemi kërkuar që të bëjë edhe sanimin dhe rregullimin e këtij problemi” – përfundoi Tmava.
KALLXO.com pati raportuar më parë për vërshimet që ndodhën në janar.
Pas reshjeve të shiut, uji në lumin Ibër pjesërisht pati dal nga shtrati.
Këtë e pati konfirmuar për KALLXO.com Arian Tahiri, nënkryetar i Komunës së Mitrovicës duke thënë se kjo përfshinte edhe një pjesë tek Liqeni Akulumues.
Mitrovica në situatë të vështirë nga vërshimet