Kandidati i PDK-së, Kujtim Gashi. Foto: Naser Fejza/KALLXO.com
Plani i PDK-së për investime në rajonin e Prizrenit
Kandidati për deputet nga Partia Demokratike e Kosovës, Kujtim Gashi, i cili ka qenë ministër i Kulturës gjatë qeverisjes së PDK-së, në emisionin “Debat Përnime”, më 19.01.2025, foli për disa nga projektet që kanë planifikuar t’i realizojnë në Rajonin 04 (Prizren), në rast se rikthehen në pushtet.
Kjo parti e ka paraparë në programin zgjedhor ndërtimin e hekurudhës së re për lidhjen e Kosovës përmes Prizrenit me shtetet fqinje.
Gashi tha se një hekurudhë e tillë ndihmon zhvillimin ekonomik, por edhe transportin me Shqipërinë edhe me Maqedoninë e Veriut.
Ndërsa për autostradën Prizren-Tetovë, ai tha se do ta ridizajnojnë atë.
“Natyrisht ky është projekt i shtetit të Kosovës që ka filluar. Si i tillë, përkundër defekteve të mëdha, ne do t’i adresojmë edhe problemet që i kanë banorët e Lagjes së Trimave dhe fshatit Hoçë. Këtë rrugë do ta realizojmë në afat rekord”- tha ai.
Projekt të rëndësishëm, Gashi tha që e kanë autostradën për Duhël, që kalon nëpër Lipjan, Ferizaj dhe bënë lidhjen me Shkupin. Sipas tij, kjo ndihmon lidhjen e Dukagjinit, të Prizrenit, Therandës dhe Malishevës.
Ndërsa për qytetin e Suharekës, ai premtoi se do të ndërtojnë unazën e qytetit me qëllim të lirimit nga trafiku i madh.
Kurse për Dragashin edhe Prevallën, Gashi tha se kanë paraparë ndërtimin e dy qendrave të skijimit.
Gashi tha se kanë filluar në komunë fizibilitetin e projektit për t’u furnizuar 24 orë në ditë me ujë nga Vërmica për 50 vitet e ardhshme.
“Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.
Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.
Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.
Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.
Për më shumë lexoni në linkun në vijim:
