Perëndimi i kërkon Izraelit të tregojë përmbajtje mes frikës së përshkallëzimit
Qeveritë perëndimore po i bëjnë thirrje Izraelit të tregojë përmbajtje në fushatën e tij ushtarake kundër Hamasit në Gaza, pasi frika rritet se konflikti i armatosur atje mund të dalë jashtë kontrollit.
Të enjten, Sekretari amerikan i Shtetit Antony Blinken dhe presidenti francez Emmanuel Macron e kombinuan mbështetjen e tyre për të drejtën e Izraelit për t’u hakmarrë me një paralajmërim: Kjo përgjigje duhet të jetë e drejtë.
“Izraeli ka të drejtë të mbrohet duke i eliminuar grupet terroriste si Hamasi përmes veprimeve të synuara, mirëpo ruajtja e popullatës civile është detyrë e demokracive”, deklaroi Macron të enjten mbrëma.
“E vetmja përgjigje ndaj terrorizmit është gjithmonë një përgjigje e fortë dhe e drejtë. E fortë sepse e drejtë.”
Të enjten, për herë të parë Shtetet e Bashkuara lanë të kuptohet për përgjegjësitë e Izraelit. Duke folur së bashku me Benjamin Netanyahun në një konferencë për media, Blinken tha se ndërkohë që “Izraeli ka të drejtë të mbrohet … se si e bën Izraeli këtë rëndësi.”
Në një telefonatë me Netanyahun vonë të enjten në mbrëmje, kryeministri britanik Rishi Sunak “përsëriti se Mbretëria e Bashkuar qëndron krah për krah me Izraelin në luftimin e terrorit dhe pajtohet se Hamasi nuk mund të jetë më asnjëherë në gjendje të kryejë mizori kundër popullit izraelit”, sipas qeverisë britanike duke shtuar gjithashtu faktin se “marrë parasysh faktin se Hamasi është përfshirë në popullatën civile në Gaza, kryeministri britanik ka thënë se është e rëndësishme të merren të gjitha masat e mundshme për t’i mbrojtur palestinezët e zakonshëm dhe për t’a lehtësuar ndihmën humanitare”.
Këto shqetësime u bënë jehonë private nga zyrtarë të tjerë perëndimorë, të cilët paralajmëruan se bota po përballet me një moment të pasigurt.
Ndërkohë që Izraeli po e rrit kundërsulmin e tij të fuqishëm në Gaza, frika në disa qeveri evropiane është se një luftë e plotë rajonale mund të shpërthejë.
“Çfarëdo që Izraeli dhe palestinezët të bëjnë tani rrezikon të kontribuojë në bipolarizimin në rritje për konfliktin,” tha një diplomat francez, duke folur në kushte anonimiteti, sepse ata nuk ishin të autorizuar të flisnin publikisht. “Një shqetësim i madh është rreziku që konflikti të përhapet në rajon.”
Gilad Erdan, ambasadori i Izraelit në Kombet e Bashkuara, i quajti tashmë sulmet e Hamasit dhe rrëmbimin pasues të civilëve “11 shtatori i Izraelit”.
Mirëpo sulmet e vitit 2001 ndaj SHBA-së e çuan gjithashtu Uashingtonin të nisë një “Luftë kundër Terrorit” globale, me përfshirjen ushtarake të udhëhequr nga Amerika në Afganistan dhe, dy vjet më vonë, në Irak, me humbjen e shumë jetëve. Mbështetja e unifikuar ndërkombëtare që SHBA-të gëzonin në ditët dhe javët menjëherë pas 11 shtatorit u nda për shkak të vendimit të Presidentit George ë. Bush për ta pushtuar Irakun në vitin2003.
“Izraeli e sheh qartë këtë si një casus belli [një akt që provokon ose justifikon luftën],” deklaroi një zyrtar i BE-së. “Ekziston një rrezik real që Izraeli thjesht e përdor këtë për një ofensivë të madhe tokësore dhe ta fshijë të gjithë Gazën”./Politico.eu
Përgatiti: Nuhi Shala
