Ngrihet aktakuzë ndaj ish-kryeministrit të Pakistanit për publikimin e dokumenteve sekrete

Një gjykatë në Pakistan ka ngritur të hënën aktakuzë ndaj ish-kryeministrit të këtij vendi, Imran Khan, nën dyshimin se i ka publikuar dokumentet e klasifikuara, njoftoi partia e tij.

Kjo është një tjetër goditje për ish-kryeministrin e burgosur para zgjedhjeve të përgjithshme që pritet të mbahen në janar 2024.

Khan akuzohet se e kishte bërë publik një dokument sekret të dërguar në Islamabad nga ambasadori i Pakistanit në Uashington.

Ai e mohon këtë dhe thotë se përmbajtje e dokumentit u publikua në media nga burime të tjera.

Khan tha se dokumenti ishte “dëshmi e një konspiracioni amerikan” për ta shtyrë ushtrinë pakistaneze ta rrëzojë atë nga pushteti përmes një vote mosbesimi në Parlament në vitin 2022, për shkak se ai e kishte vizituar Moskën pak para se Rusia ta pushtonte Ukrainën.

SHBA-ja dhe ushtria pakistaneze i mohojnë këto akuza.

Khani u rrëzua nga pushteti pasi e humbi votën e mosbesimit në vitin 2022 dhe pastaj iu priu protestave kundër Qeverisë për ta shkaktuar mbajtjen e zgjedhjeve të parakohshme, si dhe kundër ushtrisë.

Khan përballet me disa raste ligjore, të cilat i ka cilësuar si përpjekje për ta zhdukur atë nga politika.

Ai u dënua me tri vjet burgim për mosdeklarimin e parave që i kishte fituar përmes shitjes së dhuratave shtetërore. Por, ai dënim iu anulua.

Megjithatë, Khan mbetet në burg për shkak të rasteve të tjera, përfshirë për nxitjen e dhunës dhe për publikimin e dokumenteve sekrete.

Avokatët e tij thonë se ai mund të dënohet deri më 14 vjet burgim, e madje me dënim me vdekje, nëse shpallet fajtor./REL