Foto Urim Krasniqi/KALLXO.com
Nagavci: Kemi krizë në shumë fusha nga COVID-19
Nënkryetarja e Kuvendit të Kosovës nga Lëvizja Vetëvendosje, Arbërie Nagavci, tha se situata me pandeminë është përkeqësuar shumë.
Ajo ka përmendur se vetëm në 5 ditët e fundit kemi pasur rreth 4 mijë të infektuar dhe rreth 50 qytetarë sipas saj e kanë humbur betejën me COVID-19.
“Situata në bizneset e vogla dhe në bizneset familjare ku qytetarët tanë me mundin e tyre vetëpunësohen është jashtë vëmendjes qeveritare. Situata me mësimin në shkolla është në kufi të çorganizimit përkundër përpjekjes së punës së madhe që po bëhet në shkolla e kopshte”, tha Nagavci.
Masat e marra prej korrikut e deri më sot sipas Nagavcit kanë një problem themelor që nuk garantojnë siguri dhe mbështetje për qytetarët.
“Barrën më të madhe e kanë hedhur nga vetë qytetarët”, tha ajo.
Sipas Nagavcit, tani jemi në krizë të shumëanshme nga COVID – 19 pasi sipas saj situata është jashtë kontrollit. Nagavci tha se qeveria së bashku me ministritë nuk po ia dalin të menaxhojnë me këtë krizë.
“Askush nuk e dinë se si do të kalohen tre muajt e ardhshëm të dimrit që e kemi para vetës”, u shpreh Nagavci.
Këto deklarata Nagavci i ka bërë gjatë debatit parlamentar në lidhje me gjendjen pandemike në vend dhe menaxhimin e situatës me pandeminë në Republikën e Kosovës nga ana Qeverisë.