Minatorëve të Trepçës sërish u vonohen rrogat

Sindikata e Pavarur e Minatorëve të Trepçës ka njoftuar të entjen më 11.07.2024 se po ballafaqohen me vështirësi të ekzekutimit të pagave.

“Tani e sa kohë jemi duke u ballafaquar me sfida nga më të ndryshmet, përveç kushteve të vështira dhe rrezikshmërisë kemi dhënë maksimumin për të rritur prodhimin. Por përkundër përpjekjeve tona të vazhdueshme vazhdimisht jemi duke u ballafaquar me vështirësi në ekzekutimin e pagave”- thuhet në njoftim.

Sa i pëket kërkesës së kryeshefit drejtuar minatorëve për të gjeneruar më shumë të hyra përmes shitjes së xehes, sindikata thonë se e kanë të pamundur këtë gjë për shkak të kapaciteve të ndërmarrjes.

“Por një gjë duhet kuptuar, se kapacitetet tona teknologjike dhe njerëzore si minatorë, kaq mund të ofrojnë. Pa ngritjen e këtyre kapaciteteve është e pamundur që ndërmarrja të zhvillohet në ato kapacitete prodhuese dhe profitabile që do të kishin impakt të dukshëm në ndërmarrje, e që të gjithë ne e dëshirojmë”- thuhet tutje në njoftim.

“Problemet e vazhdueshme me ekzekutimin e pagave i kemi adresuar vazhdimisht, duke kërkuar qoftë nga ndërmarrja, ministria apo edhe vetë qeveria, që kjo çështje të rregullohet dhe këto probleme të evitohen”.

Sindikata e Pavarur e Minatorëve i bën thirrje menaxhmentit dhe akterëve të tjerë institucional që të gjejnë një zgjidhje të përhershme për minierën dhe minatorët.

Mosrealizimi i pagës së plotë e vonesat në paga

Ndryshe, më 26.06.2024 KALLXO.com ka raportuar se minatorët kanë hyrë në grevë për shkak të mosrealizimit të pagës së plotë.

Këtë e ka konfirmuar për KALLXO.com, përfaqësuesi i Sindikatës së Punëtorëve të “Trepçës” Destan Kërleshi, i cili ka thënë se prej gjashtë ditësh minatorët nuk kanë shkuar në punë. Pagat që kanë qenë të parapara të dalin më datë 10 qershor, janë ekzektuar më datë 14 qershor, Mirëpo siç ka bërë të ditur Kërleshi janë ekzekutuar vetëm 68%.

Më 16.05.2024 Kryeshefi i ndërmarrjes, Bashkim Kurti ka pranuar se rrogat u janë vonuar pasi ndërmarrja nuk ka arritur të gjenerojë të hyra prej shitjes së xeheve.

“E vërtetë është. Ka ndodhë për shkak të pamundësisë për me gjeneru të hyra prej shitjes së koncentratit edhe kjo është arsyeja. Edhe mua më kanë thënë që kena me punu, kena me ba maksimumin po nuk e kanë ba. Në vend se me u bo 20,000 ton xehe, janë ba 6,000 ton xehe. E unë nuk jam minator, jam kryeshef”- pati thënë ai.

Por “arsyetimin” e kryeshefit se është dashur të bëhen 20,000 tonë xehe, por janë bërë 6,000 tonë xehe e ka kundërshtuar drejtori i minierës, Shyqyri Sadiku.

“Për muajin prill janë kanë të planifikume 12,996 tonë jo 20,000 tonë   Janë përpunuar 6,000 e diçka tonë, po qajo xehe ka vazhduar me u përpunur edhe në muajin maj, që janë përpunu edhe gati 2,000 tonë pra janë 8000 e diçka tonë të përpunuara. Prej tyre janë fitu diku rreth 250 tonë koncentrat të zinkut edhe 200 janë koncentat të plumbit”- ka thënë drejtori i Minierës.

Ndërsa më 31 maj 2024, minatorët thonin se kjo gjë nuk mund të realizohet kjo gjë për shkak të mungesës së kushteve elementare që ka kjo ndërmarrje.

“Jo nuk ka shancë me i mbulu 20 mijë tonë me këto mjete, ne jemi duke e bërë të pamundshmen të mundshme”- ka thënë minatori Sadik Aliu.

KALLXO.com raportoi edhe në muajin prill për vonesat në paga dhe mosrealizim të pagës së plotë.