Mblidhet Forumi i Donatorëve për Rimëkëmbje Ekonomike
Gjatë ditës së sotme, nën udhëheqjen e kryeministrit Avdullah Hoti u mbajt takimi i Forumit të Donatorëve për Rimëkëmbje Ekonomike.
Në këtë takim me përfaqësues nga Zyra e BE-së në Kosovë, vendet donatore, agjencitë zhvillimore dhe nga institucionet financiare ndërkombëtare, me pjesëmarrjen e zëvendëskryeministrit Driton Selmanaj dhe ministres së Financave, Hykmete Bajrami, u diskutua për qasjen e përbashkët të Qeverisë dhe donatorëve për të financuar rimëkëmbjen ekonomike pas pandemisë së COVID-19 si dhe agjenda afatgjate zhvillimore e Kosovës.
“Gjatë takimit, Kryeministri Hoti falënderoi donatorët për përkrahjen e vazhdueshme për Kosovën, veçanërisht për tejkalimin e pasojave të pandemisë Covid 19. Ai kërkoi përfshirjen direkte të donatorëve në zbatimin e Programit të Rimëkëmbjes Ekonomike, ku edhe shpalosi hollësi për formën e implementimit të saj”, thuhet në njoftim.
Zyra e Kryeministrit po ashtu ka bërë të ditur se gjatë këtij takimi u prezantua gjendja aktuale rreth menaxhimit të pandemisë së COVID-19 dhe masave të programit që janë planifikuar për vitin 2021, të cilat synohet të ndërlidhen me përkrahjen e ofruar nga donatorët.
“Në këtë takim u prezantua agjenda zhvillimore e Qeverisë së Kosovës për dekadën e ardhshme, me të cilën synohet rritja e përfitimit nga iniciativat dhe instrumentet e reja financiare, veçanërisht fondet e ofruara në kuadër të Planit të BE-së për Ekonomi dhe Investime të Ballkanit Perëndimor”, njofton Zyra e Kryeministrit.
