Lufta Izrael - Hamas: zhvillimet e fundit nga atje
Izraeli po përballet me një izolim diplomatik në rritje për shkak të luftës pasi një votimi në Kombet e Bashkuara kërkoi një armëpushim të menjëhershëm humanitar në Gaza dhe presidenti i SHBA Joe Biden i ka thënë Izraelit, aleatit të tij, se bombardimet “pa dallim” ndaj civilëve po e dëmtojnë mbështetjen e tij ndërkombëtare.
Rezoluta e Asamblesë së Përgjithshme të OKB-së për një armëpushim kaloi me një diferencë dërrmuese, me 153 anëtarë që votuan pro, 10 – përfshirë Izraelin dhe SHBA-në – votuan kundër dhe 23 abstenuan.
Rezultati – duke theksuar konsensusin e ashpër në mbarë botën për nevojën për ta ndalur luftën – erdhi pasi forcat izraelite kryen sulme në të gjithë territorin. Ministria e Shëndetësisë e udhëhequr nga Hamasi ka thënë se të paktën 50 persona janë vrarë.
Udhëheqësit e Kanadasë, Australisë dhe Zelandës së Re kanë bërë thirrje për një armëpushim, duke thënë në një deklaratë të përbashkët se “çmimi i mposhtjes së Hamasit nuk mund të jetë vuajtja e vazhdueshme e të gjithë civilëve palestinezë”.
Granatimet e tankeve izraelite të martën u përqendruan në qendrën e Khan Younis, qyteti kryesor në jug të Gazës, sipas banorëve të atjeshëm. Sulmet ajrore izraelite atje vranë 11 palestinezë, duke përfshirë dy fëmijë, thanë zyrtarët shëndetësorë. Më në jug në Rafah, në kufi me Egjiptin, sulmet vranë 22 njerëz, përfshirë fëmijë.
Presidenti i SHBA Joe Biden nuk ka pranuar t’i përgjigjej drejtpërdrejt një pyetjeje mbi raportet se Izraeli po pomponte ujin e detit në kompleksin e tunelit të Hamasit në Gaza, duke iu referuar vetëm pohimeve se nuk kishte pengje në zonat e targetuara. Duke cituar zyrtarë të paidentifikuar amerikanë, Wall Street Journal ka raportuar se Izraeli kohët e fundit filloi ta pomponte ujin e detit në tunele në një proces që ka të ngjarë të zgjasë me javë.
Palestinezët që janë plagosur gjatë luftës në Gaza po përballen me vonesa potencialisht fatale si në marrjen e trajtimit brenda territorit ashtu edhe në evakuimin jashtë vendit, të shkaktuara nga burokracia izraelite dhe pikat e kontrollit ushtarak, thonë OKB-ja dhe organizatat e ndihmës. Vonesat vijnë pas një pretendimi nga Organizata Botërore e Shëndetësisë e OKB-së se stafi palestinez i ambulancës i përfshirë në një evakuim të kohëve të fundit me rrezik të lartë u ndalua me armë, është zhveshur dhe rrahur nga ushtarët izraelitë./The Guardian
Përgatiti: Nuhi Shala
