Lufta Izrael-Hamas, sipas kabinetit izraelit të luftës ka shenja 'premtuese' përparimi në marrëveshjen e re për pengjet në Gaza
Një anëtar i kabinetit të luftës izraelite ka thënë se ka “shenja të hershme premtuese të përparimit” në një marrëveshje të re për lirimin e pengjeve nga Gaza në mes të bisedimeve rajonale për të siguruar një pauzë në luftë.
Komentet e tij erdhën pasi mediat amerikane raportuan se shefi i CIA-s William Burns pritet të shkojë në Paris për bisedime pengjesh.
Ndërkohë, parlamenti i Mbretërisë së Bashkuar pati një debat parlamentar të përçarë dhe herë pas here kaotik për Gazën të mërkurën (21.02.2024) në mbrëmje.
Deputetët votuan unanimisht për një mocion laburist që bën thirrje për një “armëpushim të menjëhershëm humanitar” në Gaza, por vetëm pasi kryetarja e Dhomës së Komuneve, Lindsay Hoyle, e ndryshoi precedentin parlamentar prej vitesh për të lejuar partinë të sjellë mocionin e saj në votim.
Kryeministri i Izraelit Benjamin Netanyahu ka thënë se një votim i Knesset-it që miraton qëndrimin e tij kundër një shteti palestinez të shpallur në mënyrë të njëanshme u mbështet nga një “shumicë dërmuese kundër përpjekjes për të na imponuar krijimin e një shteti palestinez, i cili jo vetëm që nuk do të sjellë paqe, por rrezikon shtetin e Izraelit”.
SHBA i ka thënë Gjykatës Ndërkombëtare të Drejtësisë në Hagë se sulmi i Hamasit më 07.10.2023 tregoi “nevojat legjitime të sigurisë” të Izraelit në çdo zgjidhje të konfliktit në rajon. Shtetet e Bashkuara i kërkuan gjykatës të mos “konstatojë se Izraeli është ligjërisht i detyruar të tërhiqet menjëherë dhe pa kushte nga territori i pushtuar”, por në vend të kësaj “ta ruajë dhe promovojë kornizën e vendosur” për arritjen e një zgjidhje me dy shtete. Rusia dhe Franca do të bëjnë parashtresa gojore në gjykatë.
Shoqata e Qendrave të Krizave të Përdhunimeve në Izrael thotë se gjeti prova të përdhunimeve dhe abuzimeve seksuale “sistematike dhe të qëllimshme” gjatë sulmit të Hamasit më 07.10.2023 dhe pretendoi se Hamasi zgjodhi të përdorte “krime seksuale sadiste” për ta “dëmtuar strategjikisht Izraelin”. Orit Sulitzeanu, Shefi Ekzekutiv i organizatës në fjalë, ka thënë se “Raporti, i dorëzuar vendimmarrësve në OKB, nuk lë vend për mohim apo mospërfillje. Heshtja nuk është më një opsion. Presim që organizatat ndërkombëtare të mbajnë një qëndrim të qartë”.
Të paktën dy persona janë vrarë nga ajo që është përshkruar nga mediat siriane si një sulm ajror izraelit në Damask. Një ndërtesë banimi është goditur në lagjen Kafr Sousa të kryeqytetit. Ushtria izraelite nuk e ka komentuar pretendimin.
Qeveria e Mbretërisë së Bashkuar do ta konsiderojë pezullimin e licencave të eksportit të armëve në Izrael nëse Benjamin Netanyahu vazhdon me një ofensivë tokësore potencialisht shkatërruese në Rafah në Gazën jugore. Burime ministrore thanë se Britania e Madhe e ka aftësinë të përgjigjet shpejt nëse këshillat ligjore për ministrat thonë se Izraeli po e shkel ligjin ndërkombëtar humanitar./The Guardian
Përgatiti: Nuhi Shala
